#ParentLicenses2318

之前同老爺奶奶、大伯一家四口、姑仔一家四口、我哋一家四口，總共十四人去旅行，返嚟我就問大家拎旅行啲相，因為想印本相冊俾老爺奶奶

姑仔send咗七幅相俾我，有一張係大合照、六張係佢自拍，重要鬆郁矇，佢完全無同自己一家影過相

我用淘寶網店嘅相冊app設計同排版，姑仔嘅相我一張都用唔到，一上載就話「像素太低，不建議印刷」。咁算啦，都仍然有幾百張相可以揀。然而，除咗大合照，都無乜姑仔嘅相，更惶論佢老公同兩個仔

相冊印好，大家都睇得好開心，但姑仔就有啲嬲，佢兩個小朋友直頭發脾氣喊，問我做咩無佢哋嘅相。姑仔問我點解唔幫佢哋影相？搞到佢哋一家好似無份去咁

吓？電話個個都有，仔女個個都有，有手我都想幫自己仔女影多啲，點解你自己唔影呢？

大伯立即出聲：「點幫你哋影啊？你自己去到邊都走咗去shopping，留低個老公睇住兩個仔喺度打機，佢哋又唔係一齊玩，點影啊？」

大嫂坐嚟我身邊，按住我手。我感到佢怕我爆亦想安慰我，所以我就唔出聲

大伯繼續：「話明家庭旅行，你就好似自己去旅行咁，掉低兩個仔自己拍拍蘿柚就行，你有無參與過我哋啊？去到邊都淨係叫兩個仔『唔好嘈，打機啦』，你帶佢哋嚟做咩啊？」

大伯轉向姑仔兩個仔：「你兩個啊！咪喊啊！打機啦！」

姑仔無聲出，老公話夜要走，大嫂送我哋門叫我唔好嬲

讀者投稿@你有我有