#ParentLicenses2306

可能有小小離題，但做得出咁嘅行為，真係好想知佢平時係點教小朋友囉

話說星期六中午一行三人，約12:14分左右入到沙田連城某餐廳坐低。12:17落單叫嘢食，食物大概係12:26到齊。由於我同朋友本身都係食嘢比較快，所以我哋極快喺12:38左右已經清晒所有食物，職員又已經好快手收晒所有碗

與此同時，我聽到職員同後面嘅食客講：「你睇餐牌啦，睇定就有位㗎喇」

我哋原本都打算飲埋枱面杯水，撩埋個牙，抖一抖都走。點知再轉個頭，職員就即刻過嚟想收埋我哋杯水走

其實當時距離我哋入座時間係半個鐘都未夠，亦有好多枱係早過我哋入座，而又未走，所以我哋都阻止咗職員，我哋話未飲完嘅

我哋只係食得比較快，但我哋一食完就想趕走我哋？講真，餐廳想翻枱我明白嘅，但我食咗半個鐘都未夠，會唔會太過分呢？食完嘢係咪真係抖幾分鐘都唔俾，要即刻起身走呢？

未幾，職員係咁收我哋嘢走嘅動作，唔知係咪令到等位嘅一家四口誤會我哋已經食咗好耐，食完唔走喺度撳電話，所以就開始俾說話我哋聽

（由於我哋坐得好近門口）當時嗰對等緊位嘅父母係咁講說話俾我哋聽：「啲人食完重唔走，重喺度撳電話打機！阻住晒，撩個牙要撩幾耐呀？」

我隨即擰轉頭展示張單同佢講：「其實我哋入座到而家係半個鐘都未夠，我哋都係諗住食飽抖下先行啫」

當我解釋完之後，佢哋仍然繼續唔收口，講啲單單打打嘅說話，話我哋霸住啲位

聽到佢講呢啲說話前，原本都想起身走，但佢咁樣講完我更加唔想讓個位俾佢哋，我即時再加多杯飲品

最後有另一枱食完走咗，佢哋入座嘅時候，喺我哋隔離經過時又再話：「嗌多一杯飲品咁巴閉呀？！」

我想講，餐廳限時四十五分鐘用餐時間，我哋無超時嘅，如果尊貴嘅父母係覺得假期出街食飯唔想等位，強烈建議你一係早啲出嚟食，一係就去食好啲，即刻有位坐嘅。再唔係你可以有禮貌地同我哋講「小朋友真係好肚餓，可唔可以讓個位俾我哋」，我係好樂意嘅。但會唔會係用啲咁嘅方法，講啲咁難聽嘅說話單單打打，逼使我哋離座呢？（其實佢哋等位嘅時間真係十五分鐘都唔知有冇）

我為佢兩個小朋友擔心呀，做人父母咁樣做人法都有

圖片來源@英雄本色
讀者投稿@無辜俾人串嘅小市民