#ParentLicenses1927

話說一個人去餐廳食早餐，早餐時段間餐廳都幾多人，我搭枱同另一位唔識嘅先生坐卡位

有一家四口坐喺通道對面，未有嘢食之前兩個小朋友（至少三四年班或以上）多次離開座位，又走出走入餐廳。期間職員已經有禮地提醒有熱水及手推車會經過，請小朋友安坐等候

然而，父母可能有幾百萬生意，完全冇理會勸喻，只顧用手機

食物到咗，以為小朋友終於可以「安坐」？事實係見到佢哋都夠高，但係就選擇跪喺座位度

小朋友一路睇手機一路食，食到一枱都係。有啲有汁嘅食物同好多餐紙重跌咗落地，有啲跌遠啲去咗喺通道上，所以有職員拎咗個拖把來處理

點知佢老母副尊容以為自己食緊五星級酒店咁話：「我哋未食完，你可唔可以等我哋走咗先至掃？」

眼見職員其實都好忙，但係仍然有禮貌地表示：「如果唔即刻拖，一陣間有機會跣到其他客人」

我忍唔住開口小佢：「唔拖？你係咪而家自己抹返？一陣跣到其他人係咪入你數？」

對面個先生都話佢：「你兩個小朋友一路食一路跌你自己唔處理，人哋已經好忙重要幫你抹，你重好意思咁樣講嘢！？」

個老母黑口黑面，個老竇仍然全程沉迷手機

個老母重要話返小朋友：「係咪吖！掛住睇手機！跌到周圍係，俾人鬧啦！」

後來我自己都食完埋單走人，未知後事如何，但臨走前我同職員講「辛苦晒」，佢同我講「唔辛苦」

若果嗰位家長見到嘅話，唔該你自我檢討，餐廳職員都係人，俾啲尊重。其實我眼見好多餐廳都唔夠人，望做多少少，俾啲包容，咁就幫到人啦

讀者投稿@食客