#ParentLicenses2294

大女今年小四，當年因為我係校友而順利入讀我的母校（女校）。先生的大嫂近兩年都好努力幫佢小朋友（與我大女同年）考入我母校，但卻一直都未獲取錄。表妹經常問我大女考試幾多分，問到連大女都覺得煩厭，我哋已經教大女避而不談

今年到我細仔考小一，雖然細仔資質未及大女，但我哋都已經有心水。大嫂不時問有關細仔選校的事，我哋唔講，佢就去問其他同我哋較親近的親戚，問不到答案時更質疑：「咁小事都唔肯講？係咪揀啲學校太差，唔見得人呀？」

我同先生都好嬲！回想當時大嫂幫表妹準備筆試時，我都分享不少大女的past paper俾佢。而家細仔考小一，只係唔想親戚間有比較而來的壓力而唔講選校名單，就被大嫂唱到細仔「唔見得人」咁！

我同姑奶呻咗兩句，姑奶好錫我對仔女，就幫我問大嫂做乜周圍問細仔啲嘢，估唔到大嫂連姑奶都鬧埋一份，話關姑奶＿事，又用侮辱性字眼鬧姑奶

奶奶就唔知係咪驚大嫂定係俾大嫂洗腦，竟然話：「係一家人之間唔應該隱瞞，唔係唔見得人的話使乜唔肯講？」續指責因為我哋唔肯講，所以搞到家嘈屋閉！

姑奶好嬲，無啦啦被人辱罵，大嫂到而家都重係一句道歉都無，而且不斷向其他親戚講我細仔絕對係唔見得光！連我大女成績佢都要講埋一份，話肯定又係低分過表妹先唔肯講云云

件事搞到好僵，我先生都有打俾佢大哥，要求大嫂先向姑奶道歉，同埋唔好再打聽大女同細仔的學業；小朋友都有佢哋嘅私隱，我哋都要尊重返。大哥話大嫂性格係咁，改唔到，叫大嫂道歉只會更火上加油，叫我哋睇開啲，原諒佢，話晒都係一家人

直到睇到「起底唱衰」嗰單新聞，我先生都話擔心再同大嫂嘈落去，佢會傷害我哋、小朋友同姑奶。而家打算中秋唔返去做節，諗緊要點交代先好

圖片來源@ViuTV
讀者投稿@原來做大嫂係惡哂