#ParentLicenses2282

我是一所英文私人興趣班的老師，想分享一次難忘嘅事件。雖然事情已經過去，但依然使我在教育上與家長之間溝通從此多了一份小心及保留

我們的興趣班課室分成課室外的reception等待區及入課室裡的範圍。Reception等待區主要讓照顧者等接學生放學、讓小朋友等上堂，另外還有擺放產品的區域（有少量文具精品、輔助學習的圖書、教具等等），就像文具店的擺放有價錢牌，可自由挑選、取上手觀看

我們的英文興趣班是四至六人小班活動教學。這是初小班，有一次二年級的學生A在上課時，頭垂低在枱底下不知道在整弄什麼，因為小班教學不專心是相當明顯的，於是我上前查問學生A在弄什麼不專心

上前一睇，學生A手中原來拿著課室外擺放的產品（得意擦膠、小貼紙盒仔之類），而學生A是沒有購買的。我當時用平和的語氣，問學生是否在外面自己取走了產品？知道未付款的產品，不可取走嗎？學生點頭，面有難色

雖然學生A已經二年級，但我知道小朋友可能都有機會未必識分產品是不能自己袋走，所以我也沒有責怪他，只是帶他到課室外，著他將物品放回原本的位置，想著順便有品格教育的時間

怎料事情比眼見到的更嚴重。學生A打開自己袋，原來佢係拎咗好多！至少有十數樣！這時我便知道他是有意「偷」的。及後我記起，之前有多次工人姐姐遲接放學，他在等待區時表示過想買，但因他是經由工人姐姐接，每次姐姐來到都直接帶走學生A及拒絕孩子購買要求

學生A放回產品後，我便認真向學生溝通

「這樣不問自取的行為是steal偷竊，是不應該的。若在別的店舖發生，店主有權報警處理，後果很嚴重的」不過當然這次不會這樣做，只是希望他以後都不再做偷竊的行為而已。學生A點點頭，我們便回到課室上堂

考慮到事件的嚴重性，我都覺得需要向家長說明狀況，也是一個好機會教育返孩子的品德。於是，放學時我也特意向工人姐姐說明，也表達會致電給媽媽說明事件

學生A媽媽是一直的聯絡人，平時都與老師有良好溝通。我致電媽媽說明一次經過並表達非責怪孩子，只是覺得家長都有權知道發生了這樣的情況，可以與孩子溝通，嘗試了解他的想法和動機，藉着事件一同教育孩子。媽媽都表示明白，本以為事件就此完結

在當天晚上九點十點左右，突然收到陌生電話號碼，原來是學生A的爸爸。他一開始的語氣都正常，爸爸希望再聽一次整個過程發生的經過。說畢過程，他然後就來料了

爸爸語氣開始變差，話：「嗱，老師我又想問啦，點解你哋產品咁易俾小朋友拎到袋到落袋先？你哋無人睇住㗎咩？你嗰度學英文，點解要賣嘢呢？」

我心諗：喂，離晒題喎！

我：「上堂落堂咁多家長小朋友出入，我哋睇漏眼唔出奇，由第一日開張我哋店舖已經係咁擺放及設計，從來無發生失竊事件，但個重點係作為老師只係希望藉事件教育孩子而已」

「佢小朋友嚟啫，邊識『偷』啊！？佢覺得你哋啲嘢得意，睇吓啫，鍾意咪以為拎得囉！」
「你有冇寫明唔係任拎啊？我小朋友去其他補習社都無偷嘢啦，係去你度先咁，係咪你哋有問題呢？」
「而家我小朋友喺屋企喊啊，你嚇親佢啊！佢話老師會報警叫差人拉佢啊！」

爸爸大吼大叫，而且連珠炮發式不繼在電話中爆罵三十分鐘！

明明係一件好簡單嘅事，而且事非黑白咁明顯，原來直的都會可以變成曲

接著我多番說明，並非要追究錢銀或產品，而我作為老師我都覺得有責任教育孩子，要明白不可不問自取，未俾錢袋嘢落袋呢個行為係「偷」，並非唔小心、一時鍾意就解釋到。咁樣會讓小朋友好混亂，唔識分唔屬於自己的物品唔應該拎，而且呢一次錯誤嘅事件，發生咗其實冇所謂，咪當係一次學習嘅機會，點解唔係幫助孩子好好咁面對錯誤呢？

阿爸爸，而家咪就係話你知，呢個世界唔係鍾意就拎得囉。「不問自取，是為賊也」，原來你做大人都無呢個概念？

經爸爸大吼一小時電話後，我自己都好震撼，成晚瞓唔著。原來當你想教育時，家長未必想你幫佢教仔，反而盲目愛護小朋友，甚至調轉頭指責老師，小朋友會點諗？

今次投稿，我都好想知道家長有咩睇法？作為私人執業的教育工作者，是否只提供「服務」而唔教品格呢？遇到呢啲事情可當睇唔到就算？

讀者投稿@難為老師