#ParentLicenses2266

我唔知在座各位父母，你哋想生小朋友嘅原因係咩呢？想建立家庭？想生出嚟當玩具咁玩？被人中出焗住生落嚟？定屋企人想抱孫？

我哋本身真係想建立家庭，事前亦都有計劃，結果我先生所講所做嘅嘢，一切都令我非常失望，甚至係我覺得好似俾佢呃咗

自從我生咗個女，我先生係咩都唔幫手，例如見到個女爆片即刻搵地方匿，總之乜都係我搞。都算啦，我本身都係想全職湊女嘅

有日老公叫我將個女送去老爺奶奶屋企度住，然後我哋繼續二人世界。其實我同兩老關係好差，幾乎見面佢哋都唔會同我講嘢

先唔講我哋之間有咩拗撬，佢哋啲仔女全部都冇家教，所以我唔希望送個女俾佢哋照顧。而當時我女重係初生BB，更加唔會俾佢哋湊，因為佢哋一直以嚟都係用放養嘅方式湊大咁多個仔女（聽先生講嘅），再加上兩老係重男輕女得好緊要，更加唔應該送個女過去

上一段都只係前題，以下先係重點

後來，我先生好坦白咁同我講：「其實我啲阿哥家姐細佬妹全部人都決定唔生，我唔想兩老冇得抱孫而唔開心，所以先話想同你生。不如送個女去佢哋度住，俾佢哋日日玩開心下，可以嘅話生多個仔陪阿女，湊個『好』字就人生美滿」

「人生美滿」？！呢壇嘢算唔算係騙案？我嗰刻覺得自己俾人當係生仔機器

我同佢講：「你自己出去搵個鐘意你阿爸阿媽、願意同你生隊足球隊、願意將隊足球隊交俾你父母湊嘅女人，bye~」

然後我就執咗少少BB用品拎去我父母屋企，逐啲咁執自己同BB啲嘢返去住。期間佢有鬧我唔識諗，又挽留過我，更甚係我搬到返屋企後佢就日日拍門

其實我都唔知打呢堆嘢應該去感情台定生仔要考牌度投稿，我都唔知之後嘅路可以點行……

但唯獨我想同大家講：小朋友唔係工具！

讀者投稿@;(