#ParentLicenses2102

呢件事好小事，但唔知點解當時搞到我好煩躁，我想知係咪我敏感咗

事情係咁，前幾日我由內地坐飛機返香港，坐窗口位，後面嗰行坐住個年約四至五歲嘅小朋友，講普通話嘅

當架飛機起飛離地嗰刻，小朋友就不停咗嗌：「蕉mean呀！蕉mean呀！」（普通話即「救命呀」嘅意思）

小朋友loop咗差唔多十幾廿次，直至架機「順利」飛到往天空中

我知小朋友可能第一次坐飛機起飛所以興奮，但我唔係嫌佢嘈，只係唔該唔好喺飛機上嗌救命，非常非常之唔老黎好冇？當時重要喺空中！你係咪好想一陣全機人一齊嗌救命呀？

我擰轉頭睥住佢，只見到佢媽媽一臉陶醉咁望住佢小朋友興奮，完全無意識要去阻止佢嗌，真係當堂白眼反到後腦！都唔係唔俾你出聲，你可以嗌「飛啦」「好高呀」 等等，而唔係嗌救命囉！非常非常唔老黎呀！

BTW，願全球每一次飛行都安全順利

讀者投稿@Mini