#ParentLicenses2061

我之前喺校務處工作，接觸到唔同類型家長，始發現呢代家長好容易縱容小朋友

觀察多時，我總結新常態為「大學中學化，中學小學化」——即年輕人已經係大學生或中學生，但仍然乜都由父母代勞、代出頭，學生唔係好識憑自己能力去解決問題

好似一啲簡單嘅事情，例如唔記得帶書、PE衫，我哋以前都會偷雞問隔離班借，但而家啲學生係會直接落嚟校務處同我哋講冇帶書，更甚係有啲會同我哋講話冇錢，重問校務處借錢

我哋都會同佢哋講：「你直接同返老師講或者同學借啦」

又或者會有啲學生一個電話打俾家長或者工人姐姐，家人就千里迢迢由屋企撲本書、欠帶嘅嘢拎嚟學校

匪夷所思嘅係家長覺得理所當然，好老實，以前讀書嗰陣，阿媽只會鬧一句「抵你死！」然後由得我被老師罰🫠

再舉例，學校最近舉行陸運會，一向喺隔離區嘅運動場搞，而好多時都係學生自己去運動場嗰邊

之前就有家長打嚟投訴話點解要去到咁遠搞，又話咁早冇時間車自己仔女去運動場

後尾家長再講咗一句我自己覺得幾離譜嘅一句說話：「我唔識教佢搭車，你哋學校安排吓喇！」

我心諗，你作為家長唔識教自己仔女搭車，就將個責任推晒俾學校？！

讀者投稿@書記seafood