![](https://i0.wp.com/backup.parentlicenses.hk/wp-content/uploads/2023/01/2051.png?resize=740%2C740&ssl=1)
#ParentLicenses2051
政府未出聲話密切接觸者可以照常上學,就已經有好多熱切期盼上學嘅家長照俾小朋友返學。而我女讀嗰間幼稚園,就係有好多呢一類嘅家長
佢哋嘅熱心程度可以用呢個例子講起:有次因為班上有一位小朋友先確診,四日後,班主任及其同班同學連續不間斷輪流確診,而且因為多個學生家中有確診者,需要全班停課
及後,第一位確診嘅小朋友就俾其友好家長踢爆:「前兩日佢家中有人確診,未轉陰性」
我懷疑就係咁所以先喺學校傳染開去
嗰位小朋友上午正常上學,放學到家即時就同學校申報發燒,以及快測陽性。情況好令人懷疑,難以理解乜你唔係每日早上快測咩?半日制上學,加上回家路程,共四小時內十分戲劇性由陰變陽?
同佢相熟嘅嗰位家長表示:「嗰位小朋友早上已經感到不適,咳到嘔,照帶佢返學」
我覺得小朋友流鼻水下意識用手抹咗,或者咳、唔舒服,佢都未必好識講出嚟,另外呢隻菌傳染能力咁高,家中有人確診的話,幼稚園又唔係必需嘅課程,有必要咁熱衷返學嗎?
希望各位家長理解,我唔係防疫撚,但我只希望大家做好自己,希望咁多位小朋友都健康平安
讀者投稿@給所有熱心上學的家長