![](https://i0.wp.com/backup.parentlicenses.hk/wp-content/uploads/2023/01/2038.png?resize=740%2C740&ssl=1)
#ParentLicenses2038
件事係發生喺12月28日早上9點17分左右,地點係荔枝角利豐大廈地下嘅OK便利店
相信喺荔枝角返工嘅人,都大概知道利豐地下嗰間OK便利店係地面三間入面最細嗰間。鋪頭佈局只係得一個U字型,直入飲品櫃,然後U去另一邊俾錢
而就喺今早,當個個打算喺便利店趕住買早餐,人山人海嘅時候,有一家三口塞咗喺飲品櫃個位,又正正喺U字位嘅打橫位置
其實塞喺嗰度,你一係拎嘢爽手啲,一係側身俾人行過去,或者俾人開雪櫃。大家互就無乜所謂,但係佢哋一家三口係喺度討論緊要唔要買嘢飲!
起初個小朋友打開雪櫃拎住包維他奶喺手,個爸爸就話:「唔使買嘢飲,佢有水」
個媽媽話個爸爸:「一陣都要飲嘢,想佢買野嘢飲」
適逢我想拎嘢飲,講句「sorry唔該」,無人理,由得個小朋友又開又關個雪櫃門。咁我咪趁小朋友再次打開雪櫃,就伸手去拎咗支茶,佢哋全家即刻望咗我一眼,彷彿好似我阻住佢哋咁
然後佢哋再繼續討論,當時我拎住嘢飲諗住去俾錢之際,但係前無去路,後面人又嚟緊,所以我又講句「sorry唔好意思」,佢哋居然如入無人之境咁完全無視我。呢一刻我都阻住後面拎嘢,就唯有側身喺佢哋中間攝過去
如是者,我終於去到收銀處,喺呢個時候,我聽到個男人都幾大聲又無禮貌咁同俾佢哋塞住嘅人講:「姐姐!我哋揀緊嘢㗎!你等等先得唔得呀!?」
我轉頭一睇,個男人黑面,個女人黑面拉住個細路企埋一邊
我好想借呢個平台同佢哋講:「呢間便利店唔係你屋企開,你要教仔飲水健康又好,唔好浪費都好,喺唔影響到其他人嘅情況底下,你教幾耐都無所謂。另外,小朋友又開又關雪櫃門,係會有夾到手指嘅危險性。飲唔飲嘢好平常,你哋不如先制止佢呢個行為,以免受傷」
最後真心想講句:「唔係扮聽唔到,就真係聽唔到,小朋友都望住,小朋友係聽到人哋講『唔該借借』!你哋重可以若無其事咁無視人哋,去討論你哋嘅飲唔飲問題,重大條道理咁話自己揀緊、自己點點點,咁樣對小朋友嘅觀念會有影響!」
讀者投稿@荔枝角上班族