#ParentLicenses1963

早兩日去咗香港文化博物館，喺粵劇文物館裡面有個位置，係對住個電視，然後揀選角色，於螢幕內就會將你變成粵劇角色

嗰度有兩部機，我哋行到埋去，見有一行大約5-6個人喺度玩緊。當中有兩個係小朋友，起初唔知佢哋係一家人

排咗一陣後，有一部機無人，我就叫小朋友同老公埋去玩。點知一起步想行埋去，就有個女仔即刻行埋去擋住，唔俾我哋埋去，但重點佢自己又唔係玩

跟住我好好聲氣講咗句：「小妹妹，點解要霸住唔俾人玩呢？」（自問唔係責怪佢）

小妹妹身旁一位唔知係爸爸定係咩人就出聲話我：「邊有人霸住丫，你行埋去咪得囉！佢小朋友嚟咋，你行埋去，佢會俾你哋玩㗎啦！」

不惑嘅我咪同佢講：「你小朋友企埋去張開隻手唔俾我哋行埋去，唔通我唔理佢咩？」

老實講，在場幾個大人都無一個去控制佢嘅，連叫都無叫個小朋友一聲，只掛住自己玩，自己小朋友咁樣，都重好意思話人哋不是。成件事我無怪個小朋友，反而係一個大人點解可以咁顛倒是非嘅，其實你哋確定自己識教？

讀者投稿@Joey