#ParentLicenses1901

自從上年有了個女之後，老公對我的態度轉變了，且傷了我很多次心

我的體力因為肥胖和湊女總是很疲累，另因我總是在準備不時所需，但老公卻認為不需要、不必要

最近即使在街外，老公甚至都經常會呼喝我，有時候當我站在他和女的身後，覺得自己似一個「阿四」

在前幾個月，我對老公的精神需求很大，希望他是可以和我一起湊，因為我也是個新手媽媽，精神休息不足和壓力總是一直高企，就算有時候有我媽媽和清潔姐姐幫輕了很多，但是我愈來愈覺得事情沒在向好的方向發展

直到五月，我受不了長期沒質素的休息，老公就說幫我看夜晚。那一個月我的確可以好好的睡一覺，但是後續並不是我幻想的那麼好

因為夜晚要陪個女睡，老公對我這個老婆開始起了我想像不到的變化——他會覺得我的要求是「工作」，我對他的體貼是「老奉」

我覺得他對我的情感，沒有以前的愛護了。以前的他，會自豪說自己很縱老婆，然而現在的他會聽人講「太縱」我，從而認同他人所講，再轉達給我知道

觸發點是七月吧，老公想一家人去南丫島，但我到了島上就一直擔心隻狗同個女會不舒服。而我走去買把遮，老公給我的眼神是鄙視。我知道佢但求型，就是不想擔遮

行山的路程不到三份一，我怕隻狗會熱所以去了沙灘，但個女一直喊。老公覺得我先係整到個女唔舒服嘅主因，因為我嘅身體好熱又抱住佢

老公冇擔遮嘅情況下就同佢一路上山，而我就一路炆憎！行到一半，我同佢講話：「我唔想再行」

佢開咗個地圖出嚟：「仲有一半，可以返回或者行埋去」

當時佢嘅眼神話俾我聽如果我個決定係回程佢一定會唔高興。雖覺個女有中暑跡象，但我唯有迎合佢

喺行山嘅過程之中，佢望我嘅眼神只係俾到我嘅感覺係「你好無用，咁都跟唔到」。以前的溫柔我再見唔到，係已經好耐都冇見過啦

以前嘅我唔會咁委屈對住一個男人，但係我而家好似變咗怨婦咁樣，係咁諗自己老公嘅不是

返到屋企，發現個女真係中咗暑……嗰一種嘅內疚同埋自責，就算到而家呢一刻都未平伏到。嗰一晚氹咗個女好耐，因為佢一直發燒唔退

我問我老公：「點解你覺得我哋可以行到落去？」

佢答：「因為對我來講行一個鐘頭嘅山根本唔係啲咩大事」

喺嗰一刻，我知道佢嘅同理心已經唔再給予佢老婆，甚至乎一個唔夠一歲嘅BB仔都唔配擁有。有啲常識都應該覺得小朋友係唔適合喺33度去行山

到咗第二日佢做檢測，中埋COVID。嗰一刻我好傷心，係我哋兩個人將佢整病嘅

或者因為我對呢一個男人已經好失望，喺我傷心期間，我都好理性咁樣叫佢處理咗佢嘅問題先——就係佢嚟緊幾日要自我隔離，才可處理工作

自此，我應承自己要好好照顧個女。因為呢件係我最唔想發生嘅事，由佢中咗去到第三日我已經慢慢調節好，我知道自己係可以獨力湊佢，而我亦都知道我唔想再受呢一個男人氣

天意弄人，當我決定要再俾力嘅時候，我發現我又有咗。嗰一日我哋出咗去食飯，我偷偷地買咗支檢測棒，但係返到去俾我老公發現咗，驗咗出嚟係中咗

知道咗個結果之後，我哋兩公婆都冇開心嘅喜悅感

我老公不停咁話「冇可能……冇可能……我哋有咗個女之後都係行咗幾次，仲要有做避孕措施」

而我都處於極度頭痛之中，因為對上嗰次嘅性行為係四個月之前

第二日，我哋去咗婦科檢查度做超聲波，點知真係有咗四個月

醫生話：「點有可能會唔察覺到？」

嗰一下我都呆咗，因為自從照顧個女之後，我放低晒所有工作，連自己個身子有冇好好照顧都冇理到

呢幾個月嚟，我係覺得個胃唔舒服，有冇嚟月經都冇理到，以為純粹因餵奶所以冇月經係好正常，之後上網睇返，原來如果係有餵配方奶嘅話都會有排卵，所以去到檢查嘅時候，婦科醫生唔建議我落咗佢，因胎兒已經太大

之前係我主力賺錢，如果要湊兩個女嘅話，我應該冇可能再一路返工，但係去到呢一個週數要落咗佢，我又會好傷心

到咗呢一刻，我非常糾結，我好驚我會搞唔掂，無論係精神或者體力上

圖片來源@TVBS
讀者投稿@新手高齡產婦