#ParentLicenses1868

早幾日帶我小朋友去咗屋企附近嘅政府遊戲室玩，一次過見識咗三種家長

A家庭

小朋友A（下稱A）估計兩歲鬆，重未話行得好穩陣。A媽媽坐喺遊戲區入面，但望電話多過望住個小朋友，連A做啲危險動作，講緊係滑梯斜嗰邊行上行落，雖然唔算太高，但都講緊四五級樓梯嘅高度，A媽媽都係冇反應

B家庭

小朋友B（下稱B）大少少，估計4, 5歲。佢媽媽坐喺遊戲區旁邊嘅櫈，雖然係有望住個小朋友嘅，但B就係咁拎住一舊圓柱體嘅軟積木（講緊大人都要用兩隻手先拎得起嘅呎吋 ）碌向我小朋友同A度。咁當然A媽都係睇唔到啦，因為佢多數時間睇緊電話🙈

我就唯有保護埋A啦，後來B媽都有阻止B，但就佢有佢阻止，B有B繼續咁。最過份嘅係我小朋友爬緊啲都算闊落嘅梯階，而B突然坐咗喺我小朋友隔離（雖然佢都幾百厭，但唔排除佢純粹只係想同我小朋友玩），我冇即刻抱起我小朋友，只係雙手圍著我小朋友個身護住佢，點知B隻腳跨過我小朋友隻手攝咗喺佢兩隻手中間，重伸咗一腳（估計係想坐穩啲，唔係想踢我小朋友嘅……應該）

佢呀媽先過份，見到呢個情況，佢再問完B做咩之後，我聽到B媽係有啲笑意囉。Hello？唔通你覺得你小朋友咁做係好得意、係好可愛嘅行為？不過因為B冇整到我個小朋友，所以我都冇出聲，只係當B一喺我小朋友附近，我就即刻抱走佢

C家庭

隔咗一陣，小朋友C（下稱C）入咗嚟，我估計C細過B少少。C一入嚟就跑去滑梯嗰邊，喺個頂嘅位置跨欄咁跳落地下。直至跳咗第二次，佢家長就入咗嚟嗌佢：「唔好啦！」

我心諗終於有個正常啲啦，點知原來係我諗得太簡單

C冇理佢爸爸繼續跳，C爸就坐低睇住佢跳啦，而喺佢跳落去嗰個位置有一舊軟積木。C爸可能驚會整親C啦，所以佢就行過嚟，拎起咗舊軟積木扔去隔離

重覆多次，C爸係「扔」嘅🙈。雖然個遊戲室係冇乜小朋友，而佢扔嘅地方亦冇小朋友，但我質疑用扔真係好咩？

隔咗陣，C爸拎咗個波出嚟，係軟淋淋嗰啲棉花波。C爸拋俾C佢玩，再叫C踢返俾佢（係「踢」🙈🙈），不過C都係冇理佢，繼續玩返遊戲室入面嘅嘢

再相隔一會，突然聽到C爸大嗌C個名，原來係B拎住左個圓柱體積木壓咗落C度。B媽就離得遠啲要跑過去，而C爸就近啲即刻衝咗過去

C爸隨即問B：「做咩事？」
C爸語調都幾惡，鬧咗B幾句，之後搶咗柱體又扔向一邊啦

我覺得C爸已經係壓抑咗，個圓柱體重大舊個C，假如我係C家長，我分分鐘爆粗鬧埋B家長。咁問題解決咗，大家又繼續玩啦，點知輪到B同C又搶個圓柱體玩啦喎。今次事發位置喺B媽前面，而B媽係繼續坐喺度嘅，C爸就跑過去啦，冇記錯C爸好似抱走咗C

我諗過咗30秒左右，B媽同B講：「走啦～呢度好危險」

當聽到呢句，我勁無奈，心諗最危險咪係你個小朋友囉，又搵嘢碌人，又搵嘢壓人，而家重要諗住大大聲俾說話人聽🙈🙈🙈

整個故事就隨著B嘅離開而落幕

最諷刺嘅係，整個遊戲室內照顧得小朋友最好嘅係一個姐姐。基本上呢個姐姐冇離開過小朋友一步，而我因為我小朋友都重細，所以我都冇離開過佢超過三步，不過我始終分咗心食花生🙈

讀者投稿@花生友