#ParentLicenses1826

同舊上司一直有保持聯絡，我哋唔係熟到無所不談，但因為女女們個代溝咁大都啱玩（佢女9歲，我女4歲），大家又係獨女，就會見多咗

由我女1歲左右開始，出嚟食飯大約斷續都有6-7次，有兩次喺佢屋企

當時佢女7歲左右，開飯時都察覺到佢女一嚟就食晒佢鍾意嘅嘢食；有次，估唔到連佢媽咪都係一樣，我夾都未夾，成碟餸無晒

當時我都有啲眼突，不過唔緊要，我哋都只係客人。只係心諗，我同其他朋友、同事、長輩在家食過咁多次飯，都未試過遇到咁嘅奇景

到上星期，我哋繼半年後再次一齊食飯。上司好好嘅，我哋share嘢食，同埋AA制，都問我想食咩先

一上菜，我同女仲飲緊個餐湯，5分鐘時間，兩碟前菜竟然喺佢個女嘅叉子下無聲無色地無晒……

我無出聲，因為嗰個唔係我個女。如果係我個女，就算佢3歲已經有自我想法時，我就一定要教佢用餐禮議，呢啲係「個人修養」

我哋繼續食，上司又好好，切咗湯匙咁大嘅牛扒俾我女同俾我，然後再見唔到牛扒嘅蹤影，得番啲配菜

呢件事上面，我覺得好誇張，好彩我同女都食得飽，餐桌上仲有其他意粉同沙律，都有share少少，不過就算我哋食唔飽，我都唔會話佢，一嚟廢事傷感情，二嚟嗰個係人哋個女，我無資格教

對比之下，我女有個幼稚園男仔好朋友，都係4歳，每次我哋食飯，嗰位媽媽都係兒子面前，將剛到嘅飯餸，先潷落我女個碟

男仔嘅媽媽：「我哋幫羊寶寶潷咗先，跟住到你，你係男孩子，要照顧女孩子㗎～」

禮尚往來，我都會在下一道菜，同女講：「好啦，我哋都潷啲俾xx啦，大家都可以share！」

而我哋有時行街或者去玩行到攰，雙方都會不約而同帶埋對方嘅小茶點，等小朋友知道分享自己心愛嘅食物俾朋友都好開心！

再對比，我嘅好朋友，無論男女，食飯時，大家幫手互分食物，或明知有人食得少，都會多口問聲：

「剩返嗰啲係你嘅」
「你仲食唔食呀？」
「呢個好食，我可唔可以食埋佢？」

前提都係希望大家都有食過道菜

所謂餐桌禮儀，我更看重「個人修養」。我都會繼續同舊上司來往，但無可否認，佢哋除咗呢點我唔認同外，佢哋都係善良嘅人，都有佢地其他可愛嘅地方

圖片來源@九品芝麻官
讀者投稿@羊媽媽