#ParentLicenses1764

想分享一則有趣嘅事，係個女同我傾計時講返俾我知嘅

我女女讀緊小一，學校嘅常識堂教緊「家居意外」

老師叫小朋友佢哋諗下，有啲咩嘢係導致「家居意外」嘅原因，於是我女女舉手答：「媽咪」

老師問：「點解嘅？」

女：「因為媽咪一發惡就會變噴火龍，識噴火㗎，好危險㗎！」

當女女咁講完，其他同學都和應，彼此間，各人都好認同呢個睇法😂

其他同學你一言，我一語：
「係呀係呀，媽咪真係識噴火㗎」
「係呀，媽咪真係家居意外嘅原因」
「爸爸就會救火囉」
「媽咪真係好惡㗎」
「原來唔係得我媽咪會變T Rex」

聽聞，當時老師都忍唔住笑咗出來，我聽到都覺得班小朋友好可愛

睇來，我都要改善下噴火情況，避免個女覺得我係「家居意外」起因😂😂😂

圖片來源@鄭伊健 – 自動勝利 Let’s Fright
讀者投稿@兩孩媽