#ParentLicenses1724

早排見到有個post，講有個人喺某主題樂園影到個家長推住架BB車，而BB車上係坐住個疑似7歲嘅細路，然後擺上網公審

先唔講「公審」呢家嘢多乜餘又黑人憎，亦都唔講個細路係咪有啲咩隱疾，我見啲留言好多都一面倒話幼稚園生、小學生坐BB車係冇問題，然後我就住呢個話題就去同我老公講呢壇嘢

我老公居然話：「冇問題」

續道：「小學生坐BB車有咩問題？你帶得細路出街，又要拎咁多嘢，BB車方便好多，又可以裝到好多嘢，佢攰嗰時可以喺入面瞓」

我聽完呆咗

我話：「乜唔係應該幼稚園前戒BB車，呢個係個好好嘅機會去訓練耐性」

我老公感覺到我想同佢開火就終結咗個話題，講另一啲嘢了

後來，我自己都有將呢篇post分享去我自己fb。估唔到身邊都有朋友覺得冇問題云云

我朋友：「自己個細路都係咁，第時你有細路就會明，BB車係恩物」

而家我仲係大緊肚，的確呢刻我未有細路，講咩都係天下無敵，但我曾經都做過小朋友，回想返以前都係幼稚園前戒BB車，年年入主題樂園覺得攰就搵張櫈坐下，冇櫈就坐花槽邊，抖夠先繼續行，排隊排到攰就搵啲牆或者欄杆挨下

但到今時今日，咁樣真係冇問題嗎？係咪世界變咗，我嘅諗法已經過時？咁樣方便自己同遷就細路真係好咩？咁大個坐BB車真係唔覺得肉酸咩？

我唔明白，係咪世界真係已經變咗？其實我先係怪獸家長？

讀者投稿@世界好簡單但人類好複雜