#ParentLicenses1715

今日帶住狗狗喺天橋經過，方向行緊去沖涼同剪毛

突然之間，有個小朋友高速踩住架單車喺我後方衝過嚟！但因為佢喺我後面，初時我完全唔知道

轉瞬間就聽到花花慘叫（我狗狗叫花花，下稱我個女/花花），我即刻右手chok（我係chok短繩嘅）起咗個女，左手接住。當時我個女好驚！仲咬咗我一下！我抱住我隻女，成手都係我個女嘅血！

我都睇唔清發生乜事，只能夠推測佢喺我後邊快速地經過，估評應該係碌/夾到我女對腳

個老母/工人/親人勁！（我完全望唔清楚佢個樣，只知係女性）佢一句嘢都冇講，直接推佢個小朋友落車！

係「推」！你冇睇錯，我都冇講錯，然後就一手扯起架單車，一手扯住佢個小朋友落荒而逃，勁快咁落咗長扶手電梯走，此期間係一粒聲都冇出過！

首先我係一個大肚婆，我冇可能跑到去追佢；其次我女重要啲，眼見佢啲血係咁流！

我見到佢走，當刻有大叫：「你唔好走！我隻狗流晒血！」

佢頭也不回，快步逃走，整個過程一分鐘都冇。天橋比較少人經過，當時環境只有幾個人經過，大多都係老人家

無奈嘅我已經放棄咗追住佢，反方向行去寵物店借位止血先，惟感謝寵物店姐姐幫忙😭🙏🏻

心知沿路冇閉路電視，所以其實我都冇打算追究，或者搵到佢出嚟，然而就算搵到出嚟又如何？賠幾多錢到彌補唔到我女雙腳嘅傷痛！只係覺得我個女白白受咗咁重嘅傷，憤怒在一句道歉都得不到！

1. 花花已睇醫生照x-ray，可幸冇傷到骨，但腳指頭有肉壞死，要每日觀察住，希望唔會惡化

2. 最壞最壞嘅情況，如果真係惡化，嗰一部份壞死組織要切除😭，拜託大家祝福我女早日康復唔會惡化🙏🏻🙏🏻🙏🏻 [編按：以下有血腥圖片，自行斟酌睇唔睇落去]

3. 我冇事，係俾單車手柄撞到右邊小小肚，肚中BB冇受傷🙏🏻

本身覺得網絡世界太多不同聲音，身心疲累真係唔想公審，只希望嗰位女士，如果有機會見到呢個post嘅話，可以反省一下自己教育嘅方式！

小朋友需要學識承擔責任，學會面對自己所犯嘅錯誤；而你作為一個照顧者，一個成年人，就更加應該學會咩叫承擔！！！

圖片來源@2個小孩的媽媽
讀者投稿@2個小孩的媽媽