#ParentLicenses1672

大家好，我就係興平樓《奶粉事件》中嘅嗰位媽媽，多謝各位為我發聲

其實，由一開始拍片放上該平台，原意係想求助，因為真係太突然被圍封，令我失晒預算

無諗過有住戶確診咗9日，政府都無話過要強檢，突然中午朝令夕改話強檢，傍晚就圍封；職員講明，若明早有陰性報告就會放行，結果等咗5個鍾後，都只係話有陽性個案，著住戶返上屋企等

期間完全唔知發生咩事，十多小時嘅等待令我感到驚恐，尤其葵涌邨事件更驚會被圍封更長時間，所以我就喺憤怒下質問該職員及拍片，對此本人深感抱歉。所幸嘅係，最後得到該平台幫忙聯絡本區區議員協助

雖然最終收到奶粉，但該奶粉亦引起爭議。我哋唔係有錢，但由於餵哺半人奶嘅關係，所以奶粉只係後備奶。一來，1個月先食完一罐，而且BB由初生已有親友送贈該牌子奶粉，固本人沒有為BB轉食其他牌子奶粉；二來，如果要貪，點解我唔貪多幾罐？唔貪埋尿片？

另外，對於有人問：「為何有時間去拜年，無時間買奶粉？」

只因至親確實期望我們出席，所以我哋只係去食餐晚飯就直接返家，並打算於初三才外出購買日用品及食品

至於求助尿片就真係唔關我事，我BB仲著緊中碼

喺成件事中，我只想多謝幫忙嘅人，另外我一直都只係想買，無諗過要免費。自問一家自力更新，雖然搵得唔多，但未拎過綜援。其實做咩都會有人質疑，要解釋嘅我都解釋晒

同時，好感激一班政府人員不眠不休咁付出。雖然你哋都係打份工，喺言談間得知因呢個疫情圍封，令到部分職員有家歸不得。更加感謝一班醫護人員為香港嘅付出，祝願大家早日走出困境

最後，謹奢望高官能對抗疫及民生更貼地而唔係貼地地講尸吊

讀者投稿@敖太