#ParentLicenses1667

最近呢兩三年，我太太嘅姊妹都會嚟我屋企叫外賣食加拜年，每次都會有小朋友，其中一個仲要係我契仔（我之後先知，佢有無數咁多個契爺契媽），同我小朋友相差4-5歲

今次故事嘅源起，主要都係由小朋友開始

每次當小朋友嚟到都會打聲招呼就直衝我仔玩具架落力搵玩具玩。我最初都係叫佢玩時「斯文啲」「細力啲」「唔好整親」「說話斯文啲，對長輩有禮貌」，直到今年，我真係發覺佢媽媽係完全無教佢咩係規矩

今年，小朋友又係同往年一樣直衝玩具架，不停搵玩具玩，又拎玩具對戰我仔整痛佢，仲拎咗我仔本幪面超人卡薄出嚟睇，不停講「絕版」「值錢」等字眼

小朋友開頭話想要我仔一張絕版閃卡，仲提議用兩張普通閃卡，加一張普通卡交換（其實下次俾我仔都唔知幾時）。仔仔覺得無問題我都無出聲，始終細佬仔溝通，大人盡量唔加把口

之後，我留意到小朋友不停掹啲卡出嚟話「好想要」就不停袋落袋，眼見都5至6張，我就講：「好啦，拎夠啦」

小朋友仲唔停手，我遂直頭行過去開聲講。佢一聽到我開聲講，就立刻指住我，叫我收聲（當日已經指住我叫我收聲3次）

重點反而係佢阿媽講咗句說話：「佢唔會拎你仔啲嘢，xxx有禮貌啲」

但佢個仔完全當佢無到，只係收咗聲而已

直到送客後，我執嘢檢查本閃卡薄，竟發現唔見咗9張卡，不過唔肯定係唔係全部閃，只肯定係無咗9張卡。點解咁肯定？因為早兩日我仔舅父先買咗包卡俾我仔，肯定卡薄滿晒，因為當時仲有4張卡唔夠位放，我仲話要買新薄

我見到嘅係小朋友嗰種貪婪，小朋友媽媽嗰種縱容，加埋簡直係世界級，走時仲俾我一種係我唔啱嘅感覺，我真係大開眼界

圖片來源@破壞之王
讀者投稿@不便透露