#ParentLicenses1637

話說早幾日帶咗支泡泡槍同個囡去公園玩，公園啲小朋友一見到有人放泡泡就圍住我囡玩

我囡得2歲幾，怕佢啲泡泡整到其他小朋友，我已經全程喺佢側邊指導佢，叫佢唔好向住其他小朋友開泡泡，要舉高手向天，同埋叫其他小朋友行後啲，唔好行咁前

我囡都盡量配合，但有時佢一放泡泡，啲小朋友就衝埋嚟，向到小朋友塊臉時，我都用手擋住個槍頭，但真係好難控制到自己同人哋小朋友

突然，多咗一位小朋友加入玩泡泡，玩玩下佢阿媽就喺隔離不停講、不停講、不停講：「向住人哋個頭開泡泡嘅！」係咁俾說話人聽，真係好煩

呢位媽媽企喺旁邊不停喃喃自語指責我囡嘅行為，完全無拉開自己個小朋友，或者叫自己個小朋友行開啲，唔好行咁埋

大佬，我都已經喺隔離教緊我囡啦，小朋友邊有咁易控制到？你個囡咁矜貴，你唔鍾意就叫自己個小朋友唔好行埋嚟玩，又要玩，又要俾說話人聽

圖片來源@x
讀者投稿@x