#ParentLicenses1603

話說呢排出K1 offer見到好多令我不解嘅現象，我真係好想知到底係咪我唔夠chur我要考牌 ？想聽下大家意見

1. 報勁多唔同類型嘅名校，然後上fb問邊間好

完全唔明個心態，乜唔係應該本身已經有心水路線，例如happy school/傳統谷校/國際學校，然後先報同一類型㗎咩？

大佬你開個po問傳統學校vs國際學校，根本係兩回事，點比較？

若然為咗報而報，為咗個「名校光環」，委實有冇諗過自己想要咩？有冇考慮個小朋友嘅性格？有冇了解間學校嘅理念方向？

2. 係咪都叫你外補外補

又係好痴線，點解咁細個要補習？間學校英文叻就叫人補中文，相反就叫人補英文，總之一定要咩都好。有人就道出真理地就：「瓣瓣掂先讀到小學㗎，唔補先反而會辛苦」

我個人覺得真係好扭曲，我亦都冇聽過有其他地方係咁追捧幼稚園補習，但係喺香港就好似一個常態咁

3. 盲目提高standard

睇過不少面試片，例如有小朋友識背唐詩，讀一啲喺我嗰個年代小學先識既英文字等等，我真係會諗其實有冇必要？

我唔否認個小朋友的確係好叻，但係家長教佢嗰陣係為咩？我相信一定唔係為咗了解李白思鄉囉，只係為背而背

可能你會話：「人哋教仔關你鬼事咩？」

正正就係愈來愈多咁虎嘅家長喺背後發功，所謂「谷」嘅定義已經變得好模糊，假設大家小朋友都兩歲，我個仔識a-z ，你個仔識串Apple、Boy，總有人難免因比較而想追趕，變相只會越嚟越催谷小朋友，乜咁樣真係好咩？

先唔講個細路會唔會有壓力，但係家長就一定無意中好有壓力

利申：呢篇文唔係唔抵得人哋小朋友叻讀到名校，而我兒子已經有心儀offer，純粹想討論下係咪我太天真唔識玩現今嘅教育遊戲

圖片來源@CapTV
讀者投稿@佛系媽一個