#ParentLicenses2843

啱啱搵到工作，我媽就打電話嚟要我每個月俾八千蚊家用，我真係愕咗然。我人工以冇乜工作經驗嚟講係唔錯，但我真係冇諗過佢要咁多。我話我俾唔到咁多，佢就話養阿媽係我嘅責任

重點係我唔係同我媽住，佢成世人冇煮過飯冇乜做過家務，佢而家仲返緊工，以我所知佢人工超過六萬一個月另外仲有花紅，我都冇阻佢做女強人

我自細都係阿公阿婆親戚湊大，我鍾意食啲咩、唔食得啲咩、衫褲鞋著咩碼，我媽全部都唔知，就算話佢知佢亦都唔在乎，一係就反用嚟鬧我偏食冇營養所以病乜乜乜（後刪一千字）

其實佢在乎嘅就係成績同錢

小學、中學用錢唔多，佢就睇成績睇得好緊。中文考98分就鬧我嗰兩分點解會錯。每個星期六、日上興趣班已經係我嘅休息時間，因為一返到屋企佢就迫我做補充練習、溫書，而其實課本內容佢根本唔識，佢唔會教我只係叫我死背

當我想瞓晏覺或落街玩一陣時，佢就會話學生嘅責任就係讀書，要成為大人工作完先可以休息。成績以外嘅嘢佢一概不理話知我死，我小六嚟初經經痛到標冷汗唔知點算，佢就一句「食止痛藥咪得囉」，之後叫我繼續溫書

到高中、大學因為去咗外國讀，外國生活指數高用錢多咗又碰上香港股市跌，我媽每日打長途電話嚟就係鬧我做咩又使錢，碌卡每條數都要同佢報告，但其實學費、生活費大部分都係來自我爸爸走咗之後留低嘅錢

我返咗嚟香港之後，佢態度一樣都係咁，每次打電話嚟唔係指點江山叫我搵咩工搵咩公司，就係鬧我生活習慣唔好身體唔健康（再下刪一千字），每次講完電話我都好似被吸乾咁

我都一直好忍耐，以為只要我搵到嘢做，唔使佢擔心，大家保持距離，佢就唔會再煩我

係直到今日，佢一開口就要咁多家用，仲要我還錢（？），我先睇清原來喺佢心目中錢先係最重要

我真係好心累，朋友叫我只俾負擔到嘅金額，大概兩千去塞住我媽把口。老實講，我真係唔想俾，但又唔想錫我嘅屋企人親戚夾喺我同我媽中間左右為難

在此奉勸，對小朋友無愛心無母愛無父愛嘅人真係唔好生仔。如果想要高回報投資老有所依，不如買長線基金或年金

*投稿者要求請勿轉載

讀者投稿@心累的人