#ParentLicenses2805

最近睇咗好多不幸童年嘅post，唔知有冇人嘅童年可能用外人嘅角度去睇好似好幸福，但其實喺入面係充滿虛無呢？

我係喺單親家庭長大，我嘅家長並唔係返全職工，星期六日都比較得閒，會帶我周圍去

但由我小學低年級開始，佢就開始好似「泊車」咁，將我放喺任何睇落安全嘅地方，然後就叫我自己喺度玩，而佢自己就走咗去，有時甚至係玩玩下，我一轉身就唔見咗人影

呢啲地方雖然安全，但都要跨區搭車去。作為小學生又身無分文嘅我，係無可能自己返到屋企，唯一可以做嘅就係喺原地等。我每次都好驚，諗到個地方咁大，如果我行開咗，佢搵唔到我嘅，咁我可以點算？

有時佢會喺冒險樂園俾一袋金幣我，然後消失於無影無蹤。每粒金幣我都要諗過度過，計好時間先敢去用，因為我知道如果我喺佢返嚟前用晒，我就咩都做唔到，只可以企喺度呆等，無了期咁等

有時望到行過嘅有父母陪同嘅家庭，我都會諗點解人哋可以咁開心咁喺度笑

而家我長大成人，佢周不時都會講返：「記唔記得我以前帶過你去嗰度玩？你細個好鐘意去㗎」

我每次都唔會出聲，但心入面都會諗：「我記得個地方，但細個嘅我跟本唔想去」

俾人扔低喺陌生嘅環境，又要諗點樣先可以扮自己有嘢玩，又要驚唔知要自己一個留到幾時，就連想去個廁所都要驚去咗佢就搵我唔到，非常徬徨

我明白大人可以好忙，但忙嘅你俾我自己去樓下公園咪得，點解要扮盡責又要留我一個喺陌生嘅地方？

可能係我無病呻吟吧，但點解一個成年人可以覺得只要帶細路去一個地方，俾咗錢，就係叫做盡咗父母嘅職責㗎呢？

讀者投稿@ Anonymous