#ParentLicenses2784

其實我好少投稿，但呢幾日個心好唔舒服，不如放上嚟睇下大家點睇

事源喺前幾日，我同老公如常咁帶呀仔去屋企附近商場行下放下電，差唔多時間就買外賣返屋企食，我哋分咗兩間餐廳叫，咁我就帶埋呀仔去B餐廳拎咗先，再返到A餐廳同老公會合

隨後老公就同我講：「喂，你睇下前面嗰對老人家拖住個孫，啱啱個呀嫲係咁鬧個細路仔喎」

我（目測細路仔約四五歲）問：「鬧咩？」

老公：「佢話『好心你啦，成五歲半㗎啦，唔好咩都唔識咁啦，乜都要靠人，咁樣無用㗎，似足你老母咁無撚用，你老母最叻就係生咗你，跟住唔要俾埋你老豆』」

老公續說：「佢（老人家）見到個仔返嚟就即刻停口，個細路仔就全程唔出聲」

我有一刻係好想走去同佢老豆講嘅，但係我又唔係目擊者，甚至覺得可能個細路仔真係靠住兩個老人家湊住，咁樣走去爆大鑊都幫唔到件事，但我作為大人聽到呢啲說話就好唔舒服

無論大人發生咩事都好，細路仔一定係無辜，佢亦都無得揀喺邊度出世。我希望嗰位小朋友快啲長大，然後快啲離開毒親，去追尋自己想要嘅生活

讀者投稿@人地老母