#ParentLicenses2757

話說我同我小朋友去早期訓練中心做小組訓練，撞正同一個好病嘅小朋友一齊上堂

初初呢個帶病上堂嘅小朋友都有戴口罩，惟間中需要不停除底口罩擤鼻涕。老師善意提佢擤完鼻涕嘅紙巾要掉去垃圾桶同消毒雙手，家長都有同佢做咗一次

當課堂去到一半，嗰位同學就除咗口罩隨處放，擤完鼻涕啲紙巾又掉晒喺枱面，加上佢越坐越埋，我就禮貌地請佢戴返口罩，但今次對方家長不為所動，繼續睇佢嘅電話

雖然小朋友衛生常識麻麻，但係都有明確表示因為個口罩黐笠笠，所以佢唔想戴，亦都有走去家長面前尋求協助，與此同時老師都叫佢要戴返口罩

可能係聽見老師出聲，家長就粗暴地同個小朋友戴返個黐笠笠嘅口罩，再話：「呢到有口罩令，規矩係要戴口罩！」

最後，個小朋友都係戴下除下，一戴一露，仍然將個口罩周圍放，撩完鼻又摸教具，擤完啲鼻涕紙掉喺枱面，而家長都係繼續睇電話

我哋當時都有帶口罩，但係而家啲菌真係好勁，當晚我同小朋友都流鼻水、咳同發燒。其實病咗就要戴口罩，咁先可以有效預防傳播細菌，而唔單單係「守規矩」。病咗就應該喺屋企休息吓，真係唔好返學同去興趣班

讀者投稿@老母好驚病