#ParentLicenses2725

而家啲人絕對係痴L線😵😵
🥲本人，喺補習社做
🤯日籍老母、內地老豆

話說有一個小朋友返學鍾意返就返，唔鍾意返就請假，之後重要話學唔到嘢。大佬呀，你返下唔返下，學到嘢先奇啦。而呢個小朋友嘅日籍阿媽，我懷疑佢有啲精神情緒問題

當小朋友喺課室上緊堂時，佢阿媽會喺門口罅縫度企同望足45分鐘，甚至會突然之間打開課室度門，叫佢個小朋友整好啲頭髮，會叫佢個小朋友專心上堂。我睇佢係真心唔知突然間開門會嚇親其他小朋友、影響其他小朋友👧🧒🏻

如是者，每次日籍家長過嚟上課，其他家長或小朋友就會好驚🙍‍♂️🙍‍♀️，驚呢個日藉家老母又會突然上課期間打開度課室門🫣🫣。但其他家長完全唔想理佢，而被影響嘅小朋友就會返屋企同媽媽講，家長就會同返我哋講，叫我哋幫佢調時間，唔要見到呢個日藉家長，好似避鬼咁避佢😣😣

到戲肉喇💢

話說有一日佢個小朋友唔見晒啲習作簿，問我哋可唔可以補返俾佢。問題係老師每堂教佢哋都有些進度㗎嘛，咁咪印返啲餘下工作紙俾佢咪得囉。點知呢個日藉老母話唔要影印本，堅持要返本書。咁本書係要購買㗎嘛，個日藉老母又唔肯買返本書。姑勿論佢喺課室唔見定係喺街出面唔見都好啦，我哋都讓咗步，話影印俾返佢啦，佢堅持唔要影印本。咁鬼野蠻，唔要影印本咪俾錢買個本囉，咁簡單都唔明？

佢斬釘截鐵話喺課室唔見，我就問晒同班同學仔同家長，叫佢哋睇下有冇見過本書喺個袋度。嗰班得五個小朋友，個個都話冇見過佢本書，唔通本書會喺課室無啦啦消失？農曆7月就唔好開啲咁嘅玩笑啦🤪，真係人唔笑狗都吠。惟日藉老母一口咬定話喺班房裏面唔見，點解佢可以咁肯定呢？當中一定有人喺度講大話🤥🤥（說謊的人要吞一千支針）

如是者，拖到星期六，🧔內地老豆放假，內地阿爸話會買返本練習，但日藉老母話堅決唔會買，因為佢唔覺得自己有錯。而🧔內地老豆話放學之後冇打開嗰個書包直到返屋企，而阿爸當刻已經俾個阿媽講到動搖咗話要睇CCTV。我哋補習社個 CCTV 最多可以錄到三日，而佢上一次返學嘅時間已經係上上個星期，邊有可能睇到CCTV呀？擺明就喺度拖延時間又唔想買返本練習啦

原來為咗一本100蚊左右嘅練習可以嘈咗咁多日，個日藉老母話佢同佢個先生嗌交係因為呢本練習。嘩！原來本練習個威力咁大嘅，定係佢哋本身關係差到嘔？結果日藉阿媽個小朋友九月份開始就唔會再喺呢間補習社再讀課程，身為補習社中心職員我都覺得好開心以後都唔使見到佢

公司為咗唔想再同佢煩落去，決定補返本彩色嘅練習書俾佢平息咗件事，但要去簽返張簽收紙證明簽收咗本書

成件事說明咗一件事：「面係人哋俾，架係自己丟」，唔怪之得佢兩個小朋友成日都頭耷耷啦，一啲自信心到冇，原因係由細被人控制到大，小朋友自己唔見咗本書都唔識問返我哋，而啲家長靠惡就得，真係人無恥便無敵

讀者投稿@ J小姐