#ParentLicenses1522

小編你好，我係一位小學生嘅家長，今次好想匿名投稿，希望你哋可以代為登出，等多啲家長睇到，得到少少鼓勵同提醒

我小朋友現時就讀津貼學校三年級，由佢一出世開始我就已經立下心，要盡我所能令呢個小朋友健康快樂咁成長

大家都知道，喺香港教育制度下，主流教育係最便宜，家境清貧的話基本上係唯一選擇

我小朋友喺幼稚園時期好幸運咁入咗一間充滿愛心同開心嘅學校，起碼無「谷」小朋友默書寫字，甚至捉埋啲吹毛求疵嘅錯字。就係咁，佢開開心心咁度過咗3年幼稚園時間

之後就到小學了，而家就讀嘅小學係區內出咗名嘅happy school，比較多活動學習，但學術方面都仍然係要跟教育局syllabus。當中有啲嘢都係令人好無語，例如數學喺未消化一課嘅情況下，又已經chur住咁要教下一課

就喺小朋友升到小二嘅時候，有好多不知所謂嘅要求令我火冒三仗，同時我估計全港有無數家長都經歷過，例如「低」字嗰點唔可以寫成一點，要寫成一橫；又例如細「緻」嘅右傍要寫成「夂」，若果寫成「攵」就當錯；又例如數學算珠要劃得一模一樣，唔可以大小不一之類

以上種種嘅不惑，令我唔清楚到底呢啲係教育局要求，定還是小學老師自己嘅要求。我只喺整個過程裡面感受到呢個體制只要求小朋友服從，更甚者係要求家長幫忙督促小朋友服從，然而當中嘅要求、緣由等等，從來都唔會有詳細嘅解釋

有無人試過問過老師點解一定要咁寫呢？我就問過喇，亦意想不到老師嘅回應

老師：「係依照教育局嘅《小學學習字詞表》去批改」

教育局就早年已講過該表只係「參考」用，但老師們竟然就當佢係天書咁要小朋友跟。請各位回想下，我哋係用手寫字的，點解要跟一個刻印字體去寫字呢？小朋友是打印機嗎？

遇到呢啲事，我係會一概拒絕俾小朋友做任何改正，因為佢哋無做錯啊，無做錯的話，做乜要改正呢？呢個批改做法無疑係增加小朋友嘅挫敗感，而且挫敗感係會喺年月裡面累積的

我明白有好多家長懼怕搞咁多嘢會俾學校標籤，怕佢小朋友受到不公平待遇，而我就覺得小朋友要明白咩係啱、咩係錯

如果有一日，明明佢做得啱，但周圍嘅人都要迫佢改正嘅時候，佢點樣去做自己呢？亦從中俾佢明白到，權威未必一定係正確的。一般我都會喺唔同字典或者書法字帖搵返俾佢睇，佢咁寫都係正確的，至於俾唔俾分只係老師嘅決定，而我一啲都唔介意佢扣分

當度過咗幾年嘅主流教育之後，最深切嘅感受就係「威權下嘅教育」，小朋友根本喺心理上受到極多挫敗感，如果我哋身為家長無企出嚟保護自己嘅小朋友，教育制度一定會日漸蠶蝕佢哋嘅鬥志、學習興趣，呢樣嘢一定唔會係我想見到

寫咁大篇文，好想提醒各位，好好記住佢哋出生嗰刻你想呢個小朋友點樣成長？請重拾那個回憶，然後盡你哋所能stand up and fight for them。吃人的教育制度，如果你沒有挺身捍衛，有一天終會吃掉你們的孩子

開學只有兩個月已經有咁多個自尋短見嘅小朋友，而家又話谷針要小學生都打針，雖無形但已經好明顯感受到這是個吃子的制度，希望大家都正視一下，然後俾啲勇氣，堅強地做仔女最大嘅精神後盾

共勉之

圖片來源@少林足球
讀者投稿@F