#ParentLicenses1372

話說一個落大雨嘅早上，我喺繁忙嘅紅磡仁勇街等車，我係某一屋苑嘅住客

我估作為家長都知道嗰度有間好「出名」嘅幼兒園同playgroup（我未有小朋友，本身無研究，只係搬咗入嚟先知）。點解早上會繁忙？因為嗰條街都被嗰間幼兒園嘅黃色校巴同家長接送車霸晒，我住咗三年幾都慣晒

我明白家長都好關心小朋友，有能力都想親自接送小朋友返放學，但都要顧及其他道路使用者的感受同注意態度問題

今日，有家長將佢架7人車（車內有baby car seat，所以相信應該係自己車）正正泊咗喺嗰個屋苑嘅車道門口。其實咁泊都幾威，佢阻礙屋苑出車之餘，後面嘅車又行唔到，若果佢泊埋少少，至少讓後面嘅車可以過到，但當然都係block 咗屋苑個出口

顯然司機都有責任，前面嘅位已經被其他家長嘅私家車霸咗，司機應該喺後少少先停泊再落客，雖然係會淋多啲雨，但起碼唔會阻屋苑出口

重點嚟喇

7人車咁泊法，屋苑保安即刻走過嚟示意佢泊前啲，當然無理。之後車門打開，保安向坐後座嘅媽咪講：「泊前啲，唔好阻住出入口」又係無理，直情係望都唔望下

奇怪係，開咗車門成分鐘都未見有人落車。左搞右搞，後面啲車就開始不斷砵，成條街啲車都砵，連保安吖頭都出嚟望吓咩事

經過起碼4, 5分鐘後，7人車上嘅媽媽先慢慢抱住個寶貝落車同孭袋。佢一落車就怒目而視，手指指加十分之惡劣嘅態度閙個保安：「小朋友落車咋，你見唔到吖？小朋友落吖！你盲㗎？癡線！有病！」
而佢寶貝就眼定定望實媽咪

我：黑人問號？？？係小朋友又點？

其實你好快落一落車都好啲，但又唔係。我明白，你有小朋友，天又落雨，上落要開遮係會用多咗時間，但始終嗰度又唔係上落客位，仲要係車道，如果你好聲好氣話「唔好意思，好快」，人哋都未必會話你

7人車停咗車之後先左搞右搞，仲施施然搞好耐，你哋有冇諗過後面都係家長接送車，人哋無小朋友？其他道路使用者呢？個個都要讓你，等你？仲要被你鬧同人生攻擊？（諗起個保安又真係好慘，人哋做自己本份都要咁）

大部份學校都會收到運輸處指引，呼籲家長盡量使用校車服務及公共交通工具。我估計呢間學校都有呼籲家長盡量使用學校提供的校車服務，減少車輛阻塞交通，但叫學校呼籲家長要以身作則，以禮相待，作為小朋友的學習對象，難矣🤷‍♀️

呢間「名」校又真係好有問題。之前我放一個月大假，日日晏晝落街食lunch都見到同一情況，放學時間係就係無朝早咁多車，但佢哋就十幾架校巴泊滿條街，同時係無司機喺入面，泊親都起碼半個鐘，再加上家長私家車double park，只留返中間少少位俾一架車過，有時仲泊正街口，而且又係無司機喺入面。啲大巴唔夠位轉就係咁砵，頭都痛L埋，每隔兩三日就發生

當時心諗：好L嘈，咁早駛入嚟都唔知做咩，可唔可以校啱時間先駛入？

我見呢條街都有好多學校校車做上落點，人哋好快上落，唔會停留。我明佢哋只係兩三歲，要加強照顧，咁咪早5分鐘先駛入囉？不過我只係放假先見到，所以都無乜理。但今日咁就真係忍唔L住，個家長衰到呢……

我即時有同保安吖頭講：「同學校投訴啦」

吖頭回應：「講過啦，我哋之前都有向學校反映有住客投訴，叫佢哋唔好停校車喺度咁耐，但學校話無辦法，叫住客體諒同忍耐」我都明嘅……

被鬧保安加咗句：「個校長好串㗎。講咗好多次啦！」

我唔知係真係假，定佢無啦啦被人鬧完之後有情緒🤷‍♀️

當然小朋友家長一定會話：「唔係喎，啲老師校長個個都好好㗎」

緊係啦，唔通唱衰自己小朋友間學校咩？究竟係家長質素問題？定學校縱容家長咁違泊？家長就是客唔可以話？

當然你哋可以講：「你可以買第二度住㗎」「屋苑唔好租俾佢哋囉」之類

我窮，未有能力搬……但希望大家明白，每做一件事都要顧下其他人感受，唔係全世界要圍住你哋轉，尤其係當自己做嘅嘢係影響到其他人嘅時候

就算係小朋友都係咁話，「體諒」係一件事，唔係必然，但你咁嘅態度係唔係要接受呢？大家都要努力過先可以互相體諒同包容嘛，係唔係？

態度取決於一切。

P.S.：St. XX ，萬歲！將來有小朋友一定要考入，希望入到啦😏

讀者投稿@Bobobi Chan