#ParentLicenses2808

我係80後，第一次有記憶被阿媽打係喺細個時跟阿媽去石圍角徙置區探佢朋友

當時我讀緊幼稚園，至於係咩高中低同邊班已經唔記得。嗰日我同阿媽朋友個女一齊玩，因為爭玩具，我用玩具打咗對方一下

當阿媽發現之後，佢用繩將我綁喺馬路邊，再用衣架打我，作為教訓我郁手打人。當時附近嘅鄰居走出嚟，指住我話：「抵你死，蝦我哋條村啲人！」直到今日，我仍然對呢句說話印象深刻。小朋友爭玩具，本來就係成長過程中常見嘅事，作為大人，究竟需唔需要用咁樣嘅說話去對待一個小朋友呢？

幼稚園嗰陣，有一日我同細妹喺屋企張床度玩。當時我哋住喺一個studio型公屋單位。玩玩下，細妹突然跌咗落床，喊得好犀利。我老竇二話不說，即刻攞藤條不停打我，嗰一刻我完全唔知咩事點解要俾人係咁用藤條打

以我好多次俾老竇打嘅經驗話俾我知，只要我唔出聲，等佢打到手軟，佢就會停；但如果我出聲求佢唔好打，佢反而會打得更加耐。嗰一次我印象特別深刻，我一路喊一路求佢唔好再打，我仲同佢講我以後都唔敢，但佢依然冇停手，唔知打咗幾耐，當佢攰嘅時候真係停手

幼稚園時期有一日，阿媽帶我同阿妹去荃灣德士古道一間工廠送飯俾阿爸。離開嘅時候，我哋搭貨𨋢。相信有印象嘅人都知道，以前工廠貨𨋢通常係用上下拉或者左右拉閘嘅方式開關

當貨𨋢停喺某一層時，一位叔叔拉住卡板車，將啲貨推近𨋢門口，叫我哋等一等佢。等佢行開之後，阿媽突然叫我即刻衝出去，喺卡板上攞一個飄雪水晶球。我當時死都唔肯，阿媽就用拳頭頂住我個頭，只問咗我一句：「拎定唔拎？」我阿媽好鍾用拳頭打我頭殼頂，反而好少用藤條

喺嗰一刻，我只能夠用自己僅餘嘅決定能力衝出去，攞咗個水晶球，再衝返入貨𨋢。阿媽即刻拉閘，將𨋢門關上

自此之後，嗰個水晶球一直擺喺我屋企，但每次見到，我都會覺得好難受。作為一個小朋友，我已經知道偷人嘢係唔啱；到後來長大，明白到工作上犯錯有可能被炒魷魚，我就更加內疚。我曾經有好長一段時間不停諗：會唔會因為我哋偷咗呢件物件，而令到嗰位叔叔失去工作，甚至影響生計？

到咗七歲嗰年聖誕節嘅黃昏，我屋企窗口正正對住公園同滑梯。我見到有一班小朋友喺下面玩，於是問老竇可唔可以落街。佢話可以，我就即刻跑落去

玩咗冇幾耐，我突然聽到老竇喺屋企窗口好惡咁叫我返去。當我返到屋企，見到平時好少見嘅阿爺坐咗喺度。阿爺係鶴佬人，因為我爸係養子，所以平時一個月都未必見到一次

我完全冇心理準備，就俾老竇拉入屋，用藤條不停打我，一邊打一邊鬧：「嗰度全部都係男仔，你走去同班男仔玩？！」

雖然我聽唔明阿爺講緊乜嘢鶴佬話，但從佢嘅態度，我感覺到佢用鶴佬話講緊我係抵打。嗰一刻，我一路喊一路望住阿爺，好希望佢可以開口叫老竇停手，我阿爺當然冇叫我老竇停手啦，但我始終唔明白，點解我要俾人打

我小學嗰陣已經發過一個夢，夢見自己死咗。可能係八十年代睇得太多《殭屍先生》之類嘅靈異電影。有一晚，我夢見自己死咗之後返屋企探親人。夢裡面，我見到父母同細妹一家三口其樂融融，好似從來冇察覺過我已經離開咗呢個世界

嗰一刻，夢裡面嘅我竟然同自己講：「原來死咗都幾好。你哋一家三口以後幸福快樂。」喺夢入面嘅我，終於唔使再面對呢個家庭帶俾我嘅不公平同傷痛

讀者投稿@身弱無根