#ParentLicenses2766

實不相瞞，本人是一名教師，自從有了下一代後，我就擁有多重身份——教師及家長，平日日常都難免會兩個身份換來換去咁去睇一啲事情同人

話說做咗家長，咁都會入班group或級group，但估唔到連小朋友加入合唱團，有關老師竟然都開WhatsApp group

我心諗：咁大膽！我做老師咁多年，做過幾間學校都無乜老師咁大膽，課外活動都開WhatsApp group。驚訝過後，我諗呢位老師可能想方便聯絡啫

合唱團除咗平日要團員留校練習，亦有安排出團表演同比賽之類，喺呢個group嘅家長除咗會用來請假，重有報告老師唔搭校車之類瑣碎事

惟一打開WhatsApp，我戥呢個老師有排煩，因為班家長完全無時間觀念，無論夜晚十點十一點，星期日或者假期，家長都會照text老師問嘢。雖然老師未必秒回，但都會一一回覆

另外，偶爾會有一堆家長重複咁問一啲問題，自己又唔追看其他人的答覆，同一問題問十次。我就心諗：乜事呀！點解你哋要咁？學校一早出晒通告全年練習日子，梗係自己記低啦，除非有特別事情、活動同練習日子撞你先問老師啦！但佢哋唔係咁，自己又唔記低！邊日要唔要練習又問，自己睇返通告唔得咩？

老師唔係AI能夠不受地域時間限制去回覆，而且又問啲自己都搵到答案嘅問題，咁即係「懶人伸手黨」啦！哎，我覺得老師唔好隨便同家長開WhatsApp group，有乜事喺學校內聯網出通知所有家長學生就已可以啦，真係唔好咁傻！

讀者投稿@我在暗