#ParentLicenses2706

今日撞正單咁嘅事

有兩位媽咪各自拖住個仔，媽咪A（抱住個歲幾兩歲嘅BB）同媽咪B（帶住個三、四歲嘅細路）。

媽咪A見到枱面有堆「共享玩具」，就同自己個BB講：「你要問哥哥可唔可以一齊玩㗎！」點知個BB手快過口，一嘢摸落啲玩具度。媽咪A即刻扯返自己個仔，因為媽咪A個小朋友未出聲又冇表示想分享

誰知下一秒媽咪B個仔就突然攞起件玩具扑落BB度！媽咪A即刻指住個小朋友喝：「喂！唔好打我個仔啊！」

媽咪B隨即護短：「你唔好指住我個仔啊！我個仔唔想同BB玩㗎！唔想分玩具㗎！」

媽咪A反擊：「吓？呢啲係共享玩具喎！應該一齊玩，一係你就買返去俾你個仔返屋企慢慢玩啦！」

媽咪B嘅回應令現場人士驚訝：「啲玩具係我仔專登帶嚟玩具反斗城㗎！」

媽咪A忍唔住開火：「吓？帶私伙嚟玩具反斗城？唔掂得就不如收埋喺屋企玩啦！而且你個仔啲玩具被人一掂就打人，你係咪要教吓佢呢？」

媽咪B竟然理直氣壯：「係啊！邊個掂佢啲嘢，佢就出手打㗎喇！」

最後媽咪A就抱走個BB。而對方就喺媽咪A離開時叫人返屋企同返大6

到底帶玩具去玩具反斗城玩有冇錯呢？邊有人去玩具反斗城帶自己啲玩具去共享玩具嗰度放埋一齊玩？到底媽媽A指住人哋個小朋友指責又有冇錯呢？到底媽媽B個小朋友經常都係因為咁樣而打人又有冇錯呢？

讀者投稿@路人甲