#ParentLicenses2692

最近因我BB唔舒服，所以去咗屯門醫院，而且需要留院觀察。正常地，父母都會留一個喺醫院陪住BB，但直到目擊前幾日嘅情景，令我大開眼界

有個目測一歲幾嘅BB比我BB早入院，自從我BB入院後，直到第二日天光，都未有屋企人喺佢旁邊守候，佢就自己一個人係咁喊

一開頭我以為佢屋企人行開下而已，隔籬床話頭先重見到佢屋企人，點知去到深夜佢都係自己不停喊。BB喊喊下好似知無人理自己，就係咁自己拎個奶嘴落自己嘴仔度去安慰自己，睇見都好心酸

母愛泛濫下，我忍唔住就行去哄下佢、摸下佢，行近睇，原來佢重有濕疹，面仔有一大片紅。之後佢一路喊，一路成面鼻水，又搲自己個鼻，所以佢個鼻仔全部都係指甲痕。佢見到我就已經一邊喊，個頭一邊向後撼嚟撼去，係好激動嗰隻，佢應該係驚，既唔開心，又好辛苦，真係好陰公

咁我就問姑娘：「使唔使搵佢屋企人？」

姑娘話：「有啲家長係咁好安心就咁放喺度」

其實呢啲家長係咪唔知呢度係公家醫院，係無人會理佢哋？好彩有個著綠色衫啲姨姨好好，會幫佢換片同餵佢食粥仔，又會關心問佢：「你屋企人喺邊啊？」

但佢總之就一直喊，自己同自己玩。見佢好孤單，左右隔籬啲小朋友同家長都會行過去陪下佢

一直去到夜晚近七八點，佢屋企人終於嚟啦，咁啲家長就問佢媽媽：「點解BB自己喺度？」

我哋以為係佢哋返工嘅緣故，所以無奈要留BB自己喺度，點知個媽媽俾咗個驚人嘅答案

個媽媽（一本正經且好有養育經驗咁）回答：「佢就嚟要讀n班，要學識獨立，唔可以俾佢咁癡身」

佢話嚟緊就生第四個，大住個肚

大佬啊！佢歲半咋！你想自己舒服都唔係咁啊？奶粉奶咀放晒喺度，當正私家醫院咁有人幫你BB執手尾？你有無諗過你BB無人理㗎？

同日半夜，個媽媽等個仔瞓咗後，佢又走咗去，扔低個BB。我去廁所時，見到BB又喊，衣衫單薄，天氣突然間轉凍無啦啦朝早得返十幾度，我同啲媽媽真係唔忍心，所以不停過去同佢冚返被。如果唔係左右隔籬嘅媽媽幫助照顧下，相信BB都凍病咗啦！

一睇就知係媽媽當佢係累贅，真心希望呢個媽媽你睇到呢個post試下用腦諗嘢，唔好淨係識屌閪生BB，但唔識照顧

後尾佢出院嗰日，我見到嚟接佢嘅係爸爸，覆診返嚟嘅都係爸爸，個爸爸就真係攬到BB實一實。希望BB之後都一直健康，而且有爸爸繼續錫

讀者投稿@驚訝的媽