#ParentLicenses2669

承 #ParentLicenses2276 同 #ParentLicenses2504 後，已經好耐冇寫嘢上嚟，原因係我已經脫離咗幫我妹湊仔嘅工作

原以為冇乜好再寫，但今日12月14日，係我隻貓嘅告別儀式，我好想喺呢一日再寫下一啲嘢，可能同生仔考唔考牌未必好大關係，但我真係好想寫低，告慰我兩個女在天之靈！請各位包涵！

我湊咗我妹個仔歷時十個月，花費約十八萬喺我姨甥仔身上，最後喺五月尾，我選擇放棄！我一路教，我妹就一路縱返壞佢，親生媽媽都唔俾少少力，我又何必攞苦嚟辛？

我同準老公結婚前帶我爸爸媽媽去旅行，叫我妹睇返佢個仔，當時時值係姨甥仔復活假期，我已經事先安排好補習老師同佢做好晒復活節假期啲功課，剩係爭一份閱讀報告咁大把，千叮萬囑我妹要同小朋友一齊去完成

喺假期嘅最後一日，我喺日本問我妹完成咗未，佢竟同我講話：「未啊！我叫咗佢做㗎喇，不過佢唔做」

更加離譜嘅係，喺復活節假期嘅最後一日，我安排咗補習老師幫佢收心養性一下，準備返學！千叮萬囑我阿妹要喺補習老師嚟之前嘅一個鐘，俾定ADHD嘅藥佢食，如果唔係進入唔到狀態，就白白浪費金錢。最後就係即使三催四次請，佢都冇俾個仔食藥，姨甥仔根本進入唔到狀態，結果我要再俾多一個鐘頭錢，再補多一個鐘

但係呢啲都算啦，下面嘅內容先係今次投稿重點

我一共養咗四隻貓，我同我老公喺六月嘅時候結婚，兩個月後即係八月嘅時候，其中一隻貓突然間驗到有淋巴癌，已經去到冇得救嘅地步，九月就走咗；同時又有另一隻貓患上腎衰竭，11月29日都走埋

呢兩隻貓唔單止陪住我成長，亦都係陪住我姨甥仔成長。喺我姨甥仔成長嘅過程中，係呢兩隻貓教識我姨甥仔乜嘢叫做責任感、愛心、善良同擔當，真係教識佢好多好多。惟當佢哋臨走嘅時候，我問我妹俾佢仔嚟見最後一面，送別佢哋，我妹係諗都唔諗就直接拒絕

雖然我姨甥仔唔係好大個，但都已經差唔多九歲，我好肯定喺我教育佢嘅時候，佢好清楚「死亡」係乜嘢概念，係咩一回事。我姨甥仔讀嗰間小學只係喺我屋企樓下一分鐘嘅路程，只係需要佢早十五分鐘出門口，就可以見到最後一次，但係佢都唔願意，兩隻都係咁！

我並唔係要求我個妹啲乜嘢，但係連送別曾經嘅玩伴、曾經嘅家人都唔容許，可見寡情薄義嘅程度去到邊

我知道呢一度有好多人一路都喺度為家人真心付出，希望總有一日家人會予以真心嘅回報，但係我想講嘅係刻薄寡恩嘅人係唔會改變，你俾佢俾得越多，佢只會照單全收，我個妹就係最好嘅例子

我呢個所謂嘅妹，究竟最終會教個乜嘢嘅仔出嚟？大個咗又會唔會好似佢今日咁，你死你事，見你最後一眼都廢事，我真係好期待

最後我想同我兩個女講：「媽媽覺得你哋做得好好，你哋生前或死後，無論係對我定係對小朋友都充滿咗無限嘅價值，用你哋自身去令一個小朋友學識感恩同善意，媽媽以你哋為榮，永遠都愛你們」

讀者投稿@大大大大姨媽