![](https://i0.wp.com/backup.parentlicenses.hk/wp-content/uploads/2024/07/2592.png?resize=740%2C740&ssl=1)
#ParentLicenses2592
嗰日我第一日返診所助護,時間只係早上九點幾,在場已經有十幾個等緊睇醫生。其中有個工人姐姐帶住兩個小朋友,個姐姐重係咁咳!
未幾,我就收到兩個小朋友嘅媽咪打嚟問幾多錢
媽:「我小朋友排第幾個?」
我:「第六個」
媽:「你哋幾點開門?佢哋幾點落到嚟?點解咁耐?」
我:「我哋都係準時開門,因為前面有預約加上我哋未開門已經有人排緊隊」
媽:「咁得啦!」
收咗線
隔咗十五分鐘後,呢個媽咪又打嚟
媽:「重有幾多個到?」
我:「五個」
媽:「我小朋友啲藥label要寫英文!」
我:「冇問題,到時會印俾你」
媽:「我小朋友要五日假紙!」
因為佢問得太多嘢,所以我都係俾返我Senior答,下稱「S」
S:「唔好意思啊,假紙要由醫生診斷咗之後先開到俾你,但係幾多日我哋話唔到事,如果有需要可以工人姐姐入去嘅時候再打俾你直接由醫生同你講,或者你直接過嚟同小朋友一齊睇都可以」
媽:「咁我唔得閒咁點啊?一定聽到你電話㗎?我而家就係要你同醫生講啊!少少嘢都做唔到,講咁多嘢我自己落嚟啦」
直到個家長落到嚟就一路喺度嘈
媽:「叫你同醫生講開張假紙咁簡單,係都要我專登走落嚟」
S:「真係唔好意思呀,我哋話唔到事,同埋我冇要你專登走落嚟,電話同醫生講都得嘅
媽:「你哋點會話到事呀?你哋又唔係醫生。我啱啱錄咗你哋音㗎,唔好話冇呀!!我知道你哋大壓力呀,都唔係咁做嘢㗎嘛!」
當時佢攞部電話影住我哋,我哋就係咁俾佢鬧,又中又英咁,我哋都唔敢出聲
平靜咗一陣,終於到佢哋睇醫生。咁個工人姐姐個肺部有聲且氣喘,醫生就同媽咪講要直接去急症。個阿媽唔制,佢話冇人湊小朋友云云,再下刪一萬字。佢持續喺醫生房度發癲,咁醫生唯有照開住啲抗生素俾佢
睇完醫生出嚟就即刻問我哋份藥幾時拎得,又叫個小朋友同工人返屋企。再過咗幾分鐘後又催我哋,話趕時間
直到出藥俾佢,又嫌工人份藥貴,總之就處處刁難我哋,例如質問呢隻藥同嗰隻藥有咩關係、係咩成份、點解要食呢隻藥等等,迫使S要答佢
個S都唔弱,咩都叫佢入返去問醫生。佢來來回回都入咗去四五次,出到嚟就嘈話我哋乜都唔識
S忍唔住講咗句:「我哋姑娘嚟㗎咋」
媽就發癲:「你哋『助護』嚟㗎咋,連姑娘都唔係呀!」
S:「未係」
媽續:「你唔會係,一世都唔會呀!你哋咩資格都冇呀!」
第一日返工真係令我大開眼界,唔知佢小朋友第時會變成點
讀者投稿@估唔到做診所都咁多癲人