![](https://i0.wp.com/backup.parentlicenses.hk/wp-content/uploads/2024/03/2494.png?resize=740%2C740&ssl=1)
#ParentLicenses2494
喺餐廳見到有對父母帶住個幾歲大同剛識行識走嘅細路食嘢,大嗰個自己食嘢同顧住玩電話,而細嗰個就食飽後就被佢老豆老母由BB高櫈放咗落地,由得佢喺舖面周圍跑周圍衝,而且不斷搖餐廳度玻璃趟門。細路人仔細細,但搖到砰砰聲
即使係咁,父母都無理會個細,繼續自己玩自己手機同傾計。員工又唔介意佢搖門呢點先好笑,度門唔係自動門,係要趟開嗰隻
中途都有唔同客人出入餐廳,細路整整下度門後都無關得好貼,加上經佢不斷搖,門隙開咗啲,而且個闊度足以讓個細路出到去。因為間餐廳係地舖,一出去就係馬路嚟,所以我哋都出聲提醒佢哋要小心個細路跑出馬路
老豆終於捨得捉返細路返埋位,但之後依然繼續任由佢周地跌。反觀個老母,佢勁在全程無望過細路做乜,重一味開手機俾員工睇話尋晚影到佢呢個百厭細路爬上碌架床上面。老母嘅言談態度間,好似覺得自己個細路咁樣好過癮咁
好心啲父母睇緊啲自己細路,騷擾到其他人已經係一件事,係咪真係要個細路衝咗出馬路或有咩危險先識驚?睇住個細路嘅責任理應係佢哋自己,唔通有咩危險時旨意其他人救佢哋啲寶貝細路?到時唔關事嘅旁人冷眼望住有咩發生,唔好怪人冷血
個細路就話太細未必有腦諗後果(不過我永遠抱持「沒有一個世人是無辜的」呢個睇法,包括我自己,所以啲細路唔多唔少都應該為自己百厭而發生嘅後果負責任),身為父母都唔上心,人哋更加無呢個責任。如果真係有日佢哋疏忽照顧而個細路衝出馬路俾車撞,話我冷血都要講句,我會替個司機唔抵多過呢對父母,如果連累有熱心人為咗救個細路因而被車撞埋一份,佢父母兼個細路積嘅孽更加係不得了
讀者投稿@一個自認無愛心覺得啲細路好煩嘅路人