#ParentLicenses2485

由元朗輕鐵總站上地鐵月台最短嘅路程係搭𨋢，行遠啲先有電梯。咁好多人都會搭嗰部𨋢上地鐵月台，而元朗國民用親呢部𨋢都會好自律，唔會阻住地球轉

某日，有兩個女人各推住兩部BB車，再帶多個識自己行嘅𡃁妹，總共有兩大三細排隊等𨋢。當時排頭位嘅係一名阿叔，然後先輪到佢哋，而後面重有好多人排隊

𨋢到達後，大家按次序魚貫入內之際，突然見BB車入到中間後就唔郁。首先入去嘅嗰個阿叔見狀隨即就叫佢哋：「你哋再推前少少，後面重有好多人」

女人A就即刻跳掣鬧個阿叔：「BB仔要安全呀！一陣間度門夾到隻腳點算呀！」

我伸頭望下，佢老闆吖，女人A推住嘅BB車，前面重有兩個身位，而另一個女人B嘅BB車前面起碼企到三個人，但係佢入到𨋢就無郁過，個𡃁妹企喺女人B架BB車前面跳舞，加埋個阿叔都仍然可以企人，但兩架BB車就係死都唔推前，而且兩架車擺個「V」字咁阻礙埋後面嘅人攝位

到上到月台，嗰兩個女人重嬲緊，話：「BB會危險㗎嘛！重要鬧我哋！明明係佢哋用咗我哋部𨋢，係佢哋自己要逼入嚟㗎！」

本來諗住只係小事就忍讓下算，點知原來佢哋係咁諗🙂

讀者投稿@元朗國國民