#ParentLicenses2477

時間為早上九點幾，我送我女返學（幼稚園），因為遲到，所以諗住搭的士

從我屋企一落樓就係一個T字路口，我就好自然咁企咗喺個轉角位度等車。未幾，見到幾架的士嚟就揮手截下，惟全部都係冚旗或已載客

等等下，有架的士喺上個街口落緊嚟，我都試揮手截下。突然間，有個著小學校服嘅女仔喺我背後衝出嚟，企咗出去馬路中間，雙手揮手揮到好似遇溺咗截的士，非常危險

最後發現架的士都係已載客嘅，個女仔就行返上嚟行人路之際，我先見到佢阿媽施施然咁喺背後行緊過嚟

個阿媽經過我身邊嘅時候，佢大聲同佢女講：「而家啲人好無品㗎，明知見到帶住小朋友都專登企前啲同人爭車」（雖然佢個女係小學生，但已經高過佢亞媽）

好明顯係講緊我吧？我望下佢個小朋友，再望下我個小朋友，算！可能我真係無為意原來有人喺下個轉角位截緊車。但其實兩個路口嘅距離大概係三至四架巴士嘅長度左右，我真心冇望到咁遠

如是者，佢兩母女就行咗上嚟，企正咗喺我前面兩個人身位左右繼續截車。咁我都算，咪讓囉

喺大家等咗一陣都冇車之際，又有一個大叔就企咗喺我哋嘅對面馬路轉角位，加入截車行列

終於有架可載客嘅的士準備轉入嚟，但依行車方向轉入就應該係大叔嗰邊線。個小學生妹妹見到就又想衝過去啦，但咁啱有車經過，佢阿媽就拉住咗個女啦

個阿媽就大嗌：「架車我哋截先㗎！」

架的士都停咗喺佢前面咯，大叔當然係冇理會佢啦，自然上車走啦

個阿媽就一路由大叔開車門就鬧到佢閂門開車走：「正仆街！女人仔小朋友你都蝦！唔係男人嚟！你生仔冇屎忽吖！」

我心諗，喺個牛高馬大嘅小朋友面前咁樣潑婦罵街真係好咩？幸好我女全程都係後面啲長櫈度坐，魂魄都未齊，仍然釣緊魚，我諗佢應該聽唔明吧

之後個阿媽同個小朋友兵分兩路，一個企我呢邊，一個企對面線，實行嚟個大包圍。而最後，我都係決定call車，都無謂爭啦

好彩，喺我架車到之前，佢終於都上咗的士走了

其實到底係截車緊要啲定條命緊要啲？郁啲就生仔冇屎忽，到底係冇腦緊要啲定冇屎忽緊要啲？

讀者投稿@讓你囉