#ParentLicenses1448

昨晚，我半夜穿水，入咗某私家醫院準備生仔

事前我book咗4人房，喺入院嘅時候，有幸入咗間只有1個人住梗嘅房，我係第二個

我以為自己今次堅好彩，自動升咗級變半私家，點知原來只是惡夢嘅開端

時值半夜入院，我都好唔好意思嘈到人哋，於是我摸黑嗱嗱臨執好嘢，就攤響度等天光

但係一到天光，我啱啱瞓著咗半個鐘，房友就開始起身要交護士畀佢嘅功課……但這不是重點，重點係，由佢瞓醒開始，我一日之內間接聽佢嘅故事聽咗最少十次

我知道佢個B搶閘出世，而佢被迫由開刀變順產，最後成功生咗，好厲害，好意想不到，幾十萬個人讚佢好叻好叻

我知道佢個傷口好大，所以好痛，醫生特許佢個B可以入房餵

我又知道佢個B好可愛好可愛，一出世就好似識聽大人講嘢咁

我亦知道房友好勤力餵人奶，基本上佢阿B一要飲，佢就會衝去BB房餵奶

我仲知道佢下午嗰陣都真係好攰，所以瞓咗好耐

我待產期間係日頭，聽你講故事，唔緊要，若然只係喺日頭講，我唔會怪你

佢家人嚟探佢，發現佢間房有第二個人住，就表現得好似好震驚咁。我心諗，其實姑娘係咪俾錯房你？其實你係咪book咗私家房？

Anyway，下午到我生，我叫到拆咗間醫院，痛到大小失禁，生完返到房已經夜晚8點幾，我得返半條人命，又暈又想嘔，又口乾又肚餓。當時我只係想嗱嗱臨食少少嘢後食藥休息，因為我真係好攰

夜晚差不多9點幾，我食完嘢，見過晒探病時間，我好合作咁趕咗老公走，同時房友又去咗餵奶

未夠10點15分，我已經熄咗自己燈瞓覺，夜更姑娘巡埋房就熄埋大燈俾我瞓

都未瞓到11點半，房友餵完奶返嚟，開大燈、執嘢、去toilet後大力冚廁板，然後繼續講電話，打俾老公講阿B點，打俾明天幫忙接佢出院嘅朋友，再打俾朋友傾閒計

佢嘅故事重覆咗n次，包括對住真人講，對住電話講，對住 WhatsApp錄音（仲要開speaker check下自己錄得好唔好）等等

而家係半夜12點半，我已經完全醒晒，好多謝你終於肯熄燈俾我重新培養睡意，但請問你仲想傾電話傾到幾點？

P.S.：醫生係話你「血色素」低，所以要食一個月鐵丸，而唔係「血清素」低。其實鐵丸鐵水都容易便秘，你可以食多啲高鐵質嘅食物，再配合高維他命C嘅食物，會更容易吸收，又無咁易便秘整痛傷口，你可以上網自己search下

讀者投稿@大家都係剛做人阿媽