#ParentLicenses2464

交代下背景同人物先。故事角色有我、我一個剛剛三歲嘅仔、T小姐，T小姐嘅兩個小朋友，其中一個同我個仔差唔多大。其實我同T小姐唔算熟，只係同一個媽媽群組認識，出嚟食過幾次飯，傾過幾次計而已

有一日，T小組喺群組內話佢嘅外藉老公未搵到新工，所以二月會移居去第二個國家。我諗住都叫一場相識，所以就私下發短訊去祝福佢，T就好熱情咁約我去佢屋企play date。我都有少少錯愕，因為我哋不嬲無私下約，但佢開到聲，我又算安排到時間，都可以應約，當係farewell佢

我同T住得一啲都唔近，而且從地鐵落車行去T屋企，係需要經過露天嘅路段行十幾分鐘才到，不過我諗住佢可能忙住搬屋，唔介意就下佢去佢屋企。因為平日要返幼稚園我難啲去咁遠，我哋就約定咗年三十晚下午兩點

去到年廿九，我WhatsApp咗T多次，佢都有確認大家嘅約定。到年三十，我兩點去到T屋企個站，我隨即通知佢話：「我行緊嚟啦，sorry可能遲三個字先行到」

跟住佢先覆我：「死啦，我今日去咗睇樓遲咗𠻹，應該三點後先返到嚟喎」原來佢外藉老公可能有三個新嘅工作機會，雖然未confirm到offer，但都要搵定新屋搬。咁啱我仔喺BB車瞓咗，我就話：「唔緊要，我去Starbucks飲杯嘢坐下先啦」

時間去到三點幾啦，我仔都瞓醒，推咗BB車去咗佢屋企附近行。終於去到三點二十分，T小姐先施施然話：「唔好意思呀，我啱啱先返到屋企呀，但陣間五點就要出去某某地方，一係我哋再約啦？」

雖然T有話sorry嘅，不過我哋搭咗一個鐘車，等咗一個半鐘先俾人放飛機，重要唔只放我飛機，放埋我個仔飛機，呢啲應該唔係單單一句道歉解決到嘅問題吧？我都好無奈，反白眼咁話：「哈哈，你下次請返我食嘢啦」

去到呢度，故事有一段插曲，就喺我哋行返去地鐵嘅時候，突然天有不測風雲，落起大雨，雖然開咗遮，但我個仔都淋濕咗，當晚發燒三十九度

落雨嗰部分又唔算T錯，而且佢都唔知我仔發燒呢件事，不過佢都有間接造成。因為我住喺地鐵上蓋，得我一個湊仔嘅話，我通常都係去返鐵路沿線近近地行下，今次係因為佢先走咁遠

呢件事我覺得有幾個位好有問題，首先佢明知要上午睇樓，五點又要出街，點解喺年廿九嗰日唔講？第二，到年三十當日，你明知返到屋企後五點就要出街，唔使諗都知趕唔切吧，點解喺兩點同我溝通時唔直接取消再約呢？最後，你老公係外國人但你自己都係香港人，如果commit唔到就唔好過年拖人幾個鐘，你有節目唔通我就無節目？（我都為咗佢而推口咗同學仔play date）

我有諗過點樣處理，包括同佢開波，或同佢講返我嘅感受，定同媽媽群內較相熟嘅朋友呻嗎？不過我覺得做得出呢種事嘅人，應該唔會因為我同佢講而feel bad

最後，我當日夜晚成晚都瞓唔到，因為我覺得做咗個錯嘅決定而令到自己小朋友生病，難得一家放假先嚟病，我好內疚。唯有當唔好彩遇人不淑，永久黑名單

讀者投稿@擔心的媽媽