#ParentLicenses2349

其實開咗學個幾月，成日都想投稿㗎啦，而今次真係忍唔到手

事源係小朋友讀緊嗰間幼稚園有個大群組，群內冇分班別，總之大家都係K1。由開學到而家，除咗來來去去主要都係嗰幾個家長喺度自high，群內都真係有好要考牌嘅家長，例如佢哋會問做功課用咩膠水，又或者學校派咗啲填色比賽，佢哋話因為唔係學校搞所以就唔交，就問有冇人都冇交等等，總之就乜都問一餐

相比之下，「乜都問一餐」都係小事，主要係佢哋乜都要嘈一餐，重要覺得自己冇問題

有家長自爆放AirTag喺搭校車嘅小朋友書包，最癲係唔止一位咁做，而且有人重話驚俾老師發現，所以打算縫喺公仔入面。又有啲家長郁啲都話投訴，校車早咗幾分鐘又嘈，遲到就更加要嘈。其實小朋友上落車緩急不一，或者撞正上一站有小朋友扭計，因而導致早少少或者遲少少，真係咁大件事咩？

後來，學校出聲明要求接走乘搭校車嘅小朋友時出示接送證，家長就埋怨話之前好多時冇帶證都係咁接小朋友走云云。其實學校都係保障返小朋友安全啫！你唔出示證件，靠認樣容乜易被其他人接走咗你小朋友，到時又怪學校？憑咩去學校接嘅家長要出證件，而你哋班搭校車嘅唔使先？既然驚到要用AirTag去追蹤小朋友，但點解又唔驚呢樣嘢呢？

最好笑係有家長懷疑個群組有「卧底」，話因為學校好似知道佢哋喺個群內嘅聊天內容。我心諗：你哋咁痴線，有人睇唔過眼話俾學校知都好正常啫！正如我都終於忍唔住出post啦！

我真心覺得學校要對住呢班痴線家長都幾慘，成日又話老師唔夠細心，安排又有咩問題等等。喺香港地做幼稚園老師真係好大壓力，人手少不特止，重要被家長當成為保姆咁，自己就係VVVVIP，郁啲就話投訴投訴！既然學校咁有問題，咁你咪轉過間囉！不過我覺得你哋咁巴閉，最好係收返埋你個小朋友自己教啦！

除此之外，佢哋幾個自high家長竟因為兩萬蚊就喺度慫恿緊人哋生仔啊！真係CLS！

圖片來源@無間道
讀者投稿@正常少少的香港人