#ParentLicenses0854

上巴士前摺BB車是常識吧！

站頭有顯示板睇到架車幾時到，阿太太就排到尾咁滯。我坐好咗後，就突然聽到車長用比較大嘅聲線叫：

「阿太太摺咗BB車先上車」

估唔到阿太太撞聾咁款，交咗佢車上個B俾佢個已經孭住咗一個B嘅菲姐之後，強行「隊」佢部BB車上車

車長再強調一次：「要摺車」

阿太太就好唔耐煩咁話：「上咗唻咪摺，我大肚㗎！」

然後就有好心人幫佢摺車，車長就停曬車等佢哋摺。但係好心人又唔識點搞部BB車，擾攘咗一輪，終於開車

阿太太又心生不忿咁叫：「我平時搭下架巴士都唔係咁！」

車長就應佢：「咁你搭下一架啦！我架係咁㗎喇！」

好心人就勸交：「唔好嘈，唔好嘈」

阿太太就好激動，就喊咁款話：「我大住肚七個幾月，仲要送兩個（目測係N班/K1）返學！你知唔知我好辛苦！」

車長就冇再應阿太太

唔知係咪車長唔再應佢機，阿太太啲怒火又再衝上雲霄：「我產前產後抑鬱㗎！」（謎之聲：咁你睇醫生啦！）

「我好__辛苦！我要投訴你！」

果位好心人就扶住阿太太行去車頭影車長個名，阿太太影到坐返低就唻施展佢嘅獅子吼：「鄧生！我一定投訴你！」

車長繼續唔回應

阿太太開始自言自語：「我上車話咗你聽我大肚㗎啦！你睇到㗎！我仲要送返學，好辛苦」（謎之聲：你大肚係關你老公事，唔係我搞大你個肚！你冇屋企人幫你，係你屋企人問題，呢度冇人欠你！）

然後阿太太好似皮已收，唔再吼叫，好快就落咗車

如果你係佢屋企人，麻煩你帶佢睇醫生啦！唔睇醫生就俾錢佢坐的士啦！

讀者投稿@我都係老母呀！人地老母！