#ParentLicenses2314

上星期係小一自行分配學位交申請表嘅日子，各位爸媽都自然會好緊張

有一位同學媽媽係新腥港人，佢平日嘈嘈閉，又經常犯啲低級錯誤，我同佢都唔太啱傾

喺開始交表前嘅周末，因為佢臨時想改學校，所以就喺同學家長谷度問：「邊度有新表格拎？」

我睇到呆咗，完全理解唔到咩狀況：點解咁重要嘅選擇，竟可以填咗落去後，臨尾先轉？我實在感到好匪夷所思，但我睇完就算，冇再跟進落去

點知隔咗一陣，佢居然打俾我求救

佢話原來有好幾個家長即刻PM佢，甚至打去俾佢，鬧佢臨尾轉學校。佢訴說著自己全家都冇人識香港啲學校，佢就要自己留意區內好多間學校，過程中要考慮自家經濟、兩公婆返工時間、長老肯唔肯幫手接送、同埋學校嘅功課輔導支援等等因素云云，講到差啲喊出嚟

佢續說道：「之前就個個都笑我鬧我原本揀嗰間學校，而家慎重考慮完，決定轉，又俾人鬧」

我聽到都覺得好愕然，大家都係同路人，都係想俾自己仔女最好嘅選擇；就算唔認同人哋嘅選擇，又唔會煩到你要幫手照顧幫手教嘅，唔幫就算，做咩重要打去踩多幾腳呢？

成日話「生仔要考牌」，其實好多家長待人接物都需要考牌——喺你教小朋友要有禮貌、要互相幫助嘅同時，大家又有冇反思自己點樣欺凌緊一個無助嘅媽媽呢？

希望大家真係可以守望相助，俾多一點同理心。討厭呢個人嘅，唔出聲就算，唔好攻擊都可以係幫忙嘅一種方式

圖片來源@鹿鼎記2神龍教
讀者投稿@花生友