![](https://i0.wp.com/Backup.parentlicenses.hk/wp-content/uploads/2023/09/2297-1024x1024.png?resize=740%2C740&ssl=1)
#ParentLicenses2297
踏入九月十月又到各大幼稚園開放日、資訊日及面試日了,為咗了解不同嘅幼稚園,我哋都盡量抽空岀席。每次都會見到林林總總唔同類型嘅家長,有部分行為真係令人咋舌
有次去一間位於界限街嘅國際學校開放日,其實學校分別多次以手機短訊同電郵提醒因為校園門口位置細,著家長不要帶BB車。因為可能要泊喺出面,驚阻街或者唔見咗,但當日重係有一堆父母帶咗BB車,重有啲係唔摺得嘅名牌BB車。當有家長知道唔放得入學校,就同學校爭論唔見咗點算
當時係上年年尾,疫情尾聲,但學校都做足措施,希望家長同小朋友戴口罩同埋做快測先入校園。其實事前電郵都寫得好詳細,但依然有家長冇做,或者唔肯幫小朋友戴口罩,話佢小朋友由出世到而家都冇帶個口罩,佢唔會肯。老師們都好有準備,攞咗個小朋友碼嘅口罩俾家長。然而,有關家長竟然翹埋雙手,同老師講你帶到咪幫佢帶囉(exact wordings: you can try if you want, but I don’t think he will put it on)
另一次事件係去一間太子幼稚園新開嘅Playgroup試堂時發生。當時未夠鐘入去,要喺岀面排隊。有個好煩嘅媽媽,勁大聲鬧個仔,但個仔又唔理佢。佢個仔已經不受控喺條街四周圍走,俾架細玩具車佢揸,變相佢成日四圍掉咗架車,最後要爸爸岀手抱起小朋友。其後,嗰位媽媽又勁大聲同佢老公講要點樣點樣教個仔,要訓練佢孭背囊出街云云。相比現場其他人都細細聲企定定,同互相打下招呼、say hello,而佢一家就好擾民,我見企佢前後嘅媽媽們都好尷尬
有時候真心唔明,其實通告都寫到明有啲資料環節係只限家長參與,以及不要帶同小朋友岀席,但永遠有家長唔理。唔係無人湊住小朋友,所以要一同帶來學校聽,更甚係佢哋會帶埋個工人姐姐或者一對父母一齊帶埋個小朋友。帶得嚟以為係想展示俾學校睇小朋友有幾定,點知啲小朋友跟本就係不受控,大叫大喊。當中有個媽媽全程無理過個小朋友,由得個工人姐姐搞掂,又唔俾個工人行出會場。最後整個環節講咗粒幾兩粒鐘,同時個姐姐為咗小朋友唔叫就同佢抱高抱低咁玩咗兩粒鐘,睇見都覺得攰
其實無論嗰間係咩學校,係咪名校神校都好,做家長去得都係想了解自己小朋友適唔適合,咁係咪都起碼俾返少少尊重間學校?人哋事前發送嚟嘅電郵,都係咪要睇下,自己安排一下人手或者盡量配合呢?
有時候真係替啲老師覺得慘,佢哋份工作係教育小朋友㗎咋,唔係要教埋啲家長點做人吧?
讀者投稿@緊張的準N班家長