#ParentLicenses2276

承上次故事 #ParentLicenses2098 後，我妹又再有新搞作

上次新年見到我姨甥仔變得越嚟越冇家教之後，經過我屋企人嘅商量，就決定將姨甥仔放喺我度長期照顧。平日喺我度，週末先至返去我妹屋企

為咗俾姨甥仔有更好嘅照顧，我計畫請一個月假去照顧佢同埋俾佢適應新環境，所以我需要幾個月嘅時間去準備自己嘅工作安排，同埋整理下佢嘅生活環境，所以八月暑假先俾佢過嚟

然而，就喺呢段期間發生咗非常多嘅事

喺嗰段期間，我個妹好主動問我：「使唔使幫小朋友報暑期班，我可以幫手報名」

由於係啲公益團體搞嘅暑期班，報名費用便宜，故此都好多人報名，所以要抽籤先至可以知道邊一班有位。我一共報咗十一個興趣班（玩嗰啲，非催谷班）， 我諗住報十一個，點都中返三四個啩

殊不知，我阿妹到嗰日公佈結果打嚟同我講話一個都唔中，我心諗：「有冇咁離譜？」就直接打咗去問。點知嗰度嘅職員話根本冇呢個小朋友報興趣班或者暑期班嘅紀錄

喺呢個時候，我就知道係我個妹講大話！佢根本係自己唔記得咗去報，之後就謊稱冇晒位。最終好彩輊重有幾個興趣班有位，但就要比起出面用貴啲價錢去報名參加

經過呢件事之後，重有件更加恐怖嘅事發生

我妹本身有個男朋友，一齊咗好幾年，本身都好地地，嗰個男仔亦都好錫小朋友，就算唔係親生，都當成親生一樣，但係我妹失驚無神就話分手，要同第二個一齊

咁都唔緊要，感情冇分對錯，你鍾意點樣咪點樣囉！估唔到佢無啦啦話年尾要同呢個新男朋友結婚，重話結完婚要即刻再生一個BB。我心諗：「你連呢個都未搞掂，你生多個做乜鬼，咪盞攞嚟衰！

而且經我見過呢個男仔後，我就更加肯定我嘅諗法。事源佢哋約咗同我食餐飯，見個面，但個男仔嚟到兩手空空。第一次見面，去人哋屋企，重要係見女朋友嘅家姐，竟然一份見面禮都冇，重夠膽死同我講話：「因為當日工作好忙， 嚟唔切買見面禮！」

我想話，呢一餐飯係提早咗半個月約，而且我屋企樓下正門隔籮就係士多，會唔會乜都買唔到？求其整pack檸檬茶我都收貨，總好過兩手空空吧？

呢個新男朋友重同我講：「因為我家教比較嚴，所以生咗BB之後，想將BB俾父母照顧」

我心諗：「你咁都講得出？」

然後大家一齊開飯，呢個新男朋友失驚無神就話：「我唔食飯㗎喎！」

事前佢完全冇同我講過，唔食飯點解唔提早講？點解要等人哋整好晒先至開聲？之後齊人開飯，佢喺度撳電話撳唔停。雖然話係處理緊工作上嘅事，但係都可以講低聲，叫人哋食先，唔使等自己吧？

咁樣嘅人，都重話家教好嚴？我都唔知呢個定義係點嚟

最終我姨甥仔都順利嚟咗我屋企，渡過咗一段日子後，我姨甥仔由最初嘅曳到飛起，變到而家終於識得控制自己，慢慢喺度進步緊

最近發生咗一件事，終於再次令我又忍唔住上嚟開post，我驚我再唔發洩岀嚟，我真係會崩潰！但其實我已經崩潰咗……

話說，我姨甥仔對好多食物都有過敏，我盡量好小心去避免，亦買咗好多特製嘅食物俾佢。自此佢嘅過敏性濕疹亦都得到好大嘅改善，專注力亦都比以前好咗，我都好開心，感慨咁辛苦終於有成果

點知就喺早幾日俾我發現，原來我姨甥仔跟返佢媽咪嘅嗰個週末，我個妹竟然俾啲佢唔食得嘅食物佢做早餐同午餐，而我個妹係明知小朋友唔食得呢啲嘢㗎！

喺嗰一日小朋友下午有游水班，我妹中午竟然求其俾幾件麥樂雞同半個包佢食就算。呢類食物冇營養不在話下，姨甥仔對小麥過敏，根本就唔食得麵包。本身小朋友已經好瘦，應該更加要注意佢營養嘅吸收，點可以朝早俾幾塊餅，晏晝俾半個包就算

我知道咗之後，即刻檢查我姨甥仔啲手手腳腳，發現佢後頸其實已經紅咗一撻撻。我激動到踎咗喺地下度喊，因為我真係好辛苦，日日夜夜喺度監察住佢，佢啲過敏性濕疹先至好返，但一個唔該又俾人輕易地摧毀晒。姨甥仔見到我咁樣，都即刻攬住我

我真係好無力，點解你要咁樣？！我都已經幫你湊咗大部分時間，一個星期內你都係要睇佢兩日咁啫，點解都唔可以好好地照顧佢？點解要懶得咁緊要？難為我成個月跟岀跟入，自己每日都係一兩點先食第一餐。嗰個係你親生仔，我知你唔愛佢，但求你都唔好摧毀佢吖；你做媽咪做到咁，點解你都仍然夠膽話要生下個？點解你仍然有面目面對自己個仔？

做人一啲責任感都冇，已經要屋企人為你負責呢個爛攤子，你自己呢？同男朋友去旅行又唔講低聲，幾時去又唔講，去邊又唔講，幾時返又唔講，搵唔搵到你都唔知，電話都唔多個；你知唔知你個仔每個月基本使費要萬二、三蚊？你每個月擺低區區幾千蚊，你係咪認為額外嗰五、六千蚊會喺個天度跌落嚟俾我？

點解你做人做成咁？可唔可以俾返啲責任感？

讀者投稿@大大大大姨媽(超長文慎入)