![](https://i0.wp.com/backup.parentlicenses.hk/wp-content/uploads/2023/07/2223.png?resize=740%2C740&ssl=1)
#ParentLicenses2223
做精品店賣得公仔類嘅嘢,預咗小朋友入到嚟一定好興奮,一定會整亂嘢,但整理返好係我嘅工作職責,所以已經習慣。當然大部分小朋友都好有家教,甚至有啲家長都會講聲唔好意思,令我成日都覺得啲客真係好好,體諒我地嘅不易
話說我鋪有啲小勞作套裝賣緊,我哋會整個sample出嚟,其中係有一個透明球型盒,中間有個小公仔,入邊有好多彩色小豆豆。其實個小手作成日都有人拿起搖下,又撳下個蓋,我哋都有用膠紙痴好,就係驚玩嗰時太大力一啪,內裡啲豆豆跌落地真係會執死人
好喇,成個月都好地地好安全,但今日睇住閉路時,見到有個十幾歲左右阿妹,佢拿起個小手作,雙手勁大力一撳落去就啪開咗,一地都係。衝過去已經嚟唔切,我唯有死死氣拿起個手作,諗住拿拿聲執
我一拎個小手作上手,見到盒蓋已經啪爛咗,不過當時我真係一句聲都無出過,但個阿媽就已經大大聲咁先聲奪人:「佢一拿起就掉晒落嚟喇」
之後呢個阿媽嘅另一個仔重要掃跌其他嘢,個阿媽同個仔完全扮唔知,望一望就行去第二度繼續搞破壞
我真係XYZ,不過係驚嚇親同場小朋友先無屌鳩佢
首先阿姐我無出過聲話你哋一句,你使唔使身有屎先聲奪人啊?重要係大大聲講,搞到好似係我蝦你哋咁
第二,一拿上手啲豆豆掉晒,你可以瀨我哋蓋無冚好,但你個女一拿上手個蓋都爛埋?!
第三,整跌晒啲嘢都可以扮睇唔到,執返好啲嘢你可以話係我嘅職責,但睇得出你哋真係勁無禮貌,入人哋鋪頭搞破壞好似係應份咁
唔怪得你兩個仔女好似做慣做熟咁,即使整爛整跌人哋嘢都無甚反應。聽你哋講嘢應該係真香港人,真心建議你哋去深山生活
讀者投稿@精品店破壞王