#ParentLicenses2214

搭地鐵時見到一家四口，有長輩、媽媽、哥哥（似中三左右）同埋弟弟（高幼咁上下）。期間弟弟突然扭計，扭到瞓地、喊同大叫。我唔係好聽到叫乜，只見佢有啲失控，同時我覺得弟弟似係需要多啲照顧嘅類型，唔似純粹百厭

哥哥同媽媽開始時都有試拉返弟弟起身，叫佢乖，但唔成功，騷動令車廂啲人開始眼望望佢哋。家人都有少少措手不及，就諗住用嘢食氹弟弟

起初弟弟都開始冷靜啲，但因為啲嘢食有少少散落地，又開始有少少炆之際， 側邊突然有個中年男乘客就話佢哋：「你唔好食呀，喺車箱唔食得嘢㗎，我影咗你哋相，要罰2000蚊㗎」

之前呢個中年男士係咁錄voice message話call上總部，喺手度又拎住個証件，好似想show啲咩pass咁

我心諗：「阿叔啊，雖然真係整到成地都係碎，但可唔可以有少少體諒呀？呢家人已經盡量控制個小朋友——哥哥走去捉住弟弟，冚住個咀，媽媽就掃返地下（雖然只係用腳掃），長輩收返好啲嘢食，你重要係咁chur住人哋，監督住佢哋，你係咩團體呀，阿叔？」

當然，我無咁講出口，費事俾佢影相啦，我淆。港鐵幾時咁有錢請咗啲秘密糾察（可能只係我唔知）喺車廂度巡視呀？嗰位中年男士又真係九龍灣落車喎，當真返總部呀？

未幾，嗰家人無耐就落咗車

其實我家中都有小朋友，發現有好多唔同嘅原因會令到小朋友發脾氣同喊，例如溫度嘅改變、攰、肚餓、身體唔舒服等等，但佢哋又唔可以好好咁用言語去表達出嚟，就唯有用喊同發脾氣嚟表達

有啲新手父母，可能唔知點處理小朋友嘅需要，當小朋友喺大庭廣眾大呼小叫，的確會令照顧者都構成有一定嘅壓力，而且又要受旁人嘅白眼，真係雪上加霜

若果遇著一啲特別需要嘅小朋友，其實佢同照顧者更加需要大家多啲體諒、幫助、接納，而唔係一味喺度批評對方，指責做咩唔好好管教自己嘅小朋友云云。如果你見到有小朋友發脾氣，個照顧者喺度玩手機唔理佢或者用一啲錯嘅方法去管教，例如打佢、大聲鬧佢嘅時候，你先去批評人哋啦

#我係懦夫
#不喜勿插
#夏天好熱但人心好冷酷
#多一點體諒少一點批評

讀者投稿@九龍塘懦夫