#ParentLicenses2212

其實唔係我想歧視新移民，但係啲比較自私嘅家長咁啱都係有鄉音，或者直接講普通話

以下喺兒童遊戲室發生咗三件事，令我更加唔鍾意新移民

事件一

當時我小朋友企喺一位女士隔籬，然後呢位女士突然推跌我三歲嘅小朋友

我問佢：「做咩推人？！」

個女士竟然答我：「驚你小朋友踩到我小朋友」
（佢小朋友著住校服，嗰間無N班，所以起碼三歲以上）

我回應返佢：「你唔識就咁擋住或者同佢講『小心後面有人』？」

嗰位女士就擰走個頭扮聽唔到

我發現其實佢小朋友喺一嚿嘢入面好安全，點都踩唔到，除非佢小朋友會突然退後出嚟。另外，我小朋友都企咗喺度冇郁幾秒，因為當時佢聽緊啲哥哥姐姐講遊戲規則，就突然俾個大人推跌

我實在唔明點解咁大個人都要推個小朋友

事件二

今次係一位婆婆，佢嗰位兩歲半小朋友成日周圍打人

第一次係打我個小朋友，當時我唔知佢家長係邊個，就唯有淨係我自己小朋友同佢講：「唔好打人，打人唔啱㗎！」

第二日又見到同一個小朋友，今次又打人又推人

我小朋友有即刻同嗰位小朋友講：「唔可以打人同推人，咁樣唔啱㗎！」

今次事情咁啱發生喺嗰位婆婆嘅隔籬，喺佢望住個小朋友咁樣做嘅時候，佢竟然笑笑口同我哋講話：「係想同你小朋友玩啊」

我即刻婆婆講：「就算想同人玩，都唔可以打人同推人，你都唔話下佢？」

個婆婆淨係識用笑嚟回應，不過個婆婆而家見到我，會全程跟住佢小朋友，都係一件好事

不過去到第三日，佢小朋友又推我嗰個，個婆婆望到係我，就即刻有同我道歉，但就變咗另一個大啲嘅小朋友俾佢打背脊

個婆婆都係講返上面個句：「佢想同你玩咋」

個媽媽重叫佢讓下小朋友，最終俾人打嘅小朋友委屈到喊住走咗，唉

事件三

今次事情係講另一位婆婆。事源喺地下有好多一大嚿搖下搖下嘅玩具，因為有人將呢啲玩具鋪平咗喺地下，所以有好多小朋友企緊上面行，而佢個孫女想拎走其中一個

當時企咗喺嗰個玩具上面嘅有我小朋友同一位姐姐，嗰位婆婆竟然不加思索教小朋友喺前面拉，不過嗰位小朋友得三歲左右，佢唔夠力拉唔郁，我就無出聲

然後，同我小朋友玩緊嘅姐姐，就由A玩具跳去B玩具。嗰位婆婆竟然突然間拎起B玩具，令到個姐姐撞咗落個B玩具度。雖然話嚿玩具都軟，但都聽到「碰」一聲，個阿婆先放手

直到我小朋友跟住跳，本來係見到阿婆鬆咗手，但個阿婆又突然伸手拉走個B玩具。而今次我小朋友撞得重大聲，附近啲家長都嘩然同叫咗聲出嚟

我就即刻話個婆婆：「做乜係都要拎走咁多小朋友一齊玩緊嘅嘢？連續兩個小朋友都俾你搞到撞到應一應，你嘅小朋友就係小朋友，其他小朋友就唔係小朋友？」

嗰位婆婆望住我講完，就擰轉面唔回應，只表露好似覺得自己無錯咁嘅表情

平時俾啲小朋友打或者推都冇咁嬲，因為只要我或者我小朋友講多幾句，啲小朋友都會認知自己嘅錯誤同道歉。當然都有少部分新移民家長係有禮貌嘅，所以遇到呢啲家長真係當自己唔好彩

多謝各位睇到呢度🙏打出嚟都係為咗發洩，當時可以做嘅嘢都已經做咗，但都仍然係有團火喺度，不吐不快。再次感謝各位睇到呢度🙏

讀者投稿@唔想出街嘅人