#ParentLicenses2197

最近識咗個新女性朋友，她不停跟我說自從跟老公生完仔之後，他們倆之間就沒有感情，也沒有性生活

其實沒有感情我相信都唔係單方面發生，有時覺得佢都有啲橫蠻無理，好主觀好有自己一套，永遠覺得自己的教育方法是最好的

例如佢會虎媽上身，樣樣嘢都唔同老公商量，可能亦都係呢個原因佢老公慢慢地都唔想同佢商量任何事，但係佢又冇搵錢能力，所以就要「屈就」同佢老公一齊住，分房瞓又唔關心老公，剩係識使佢啲錢

佢個老公都算盡責，俾張信用卡佢，但係就冇現金過手，所以每次同佢出嚟食飯都不停投訴。最初我都會企喺佢嗰方面，覺得佢好可憐一個女人仔，但係我慢慢都發現佢鍾意用這種受苦嘅形象去博取他人同情，發放一堆負能量，不停投訴老公，不停話自己湊仔辛苦

其實所謂嘅「辛苦」都係佢自己攞嚟嘅——究竟有冇必要個仔參加咁多課外活動呢？

自己家庭環境又唔係特別富裕，又冇工人又冇車，但係就鍾意同個仔報好多課外活動，搞到自己好似順豐速遞咁經常孭住一包二包，又周圍同人哋講佢老公唔理佢

其實喺某程度上，我發現佢係想用不停出街呢個方式去避開佢老公，所以我每次聽完佢嘅故仔 我都會有一百個問號，然後不停問佢點解。當越聽越多嘅時候，我就歸納出原因其實根本就係佢公主病上身。佢希望個老公所有嘢都會照佢方法去做，而且要喺唔需要溝通之下就期望個老公識用讀心術知道佢想要乜嘢

我都係女人，我都希望我唔使講我老公識做，但完全唔溝通佢就以為老公會識做？冇可能啩！而且佢都分享咗好多佢自私嘅諗法，希望一直住喺老公度使佢嘅錢過好生活，但係相反地佢冇為一個家付出，亦都冇關心佢老公，只係不停話希望個仔大個之後就離婚云云

我甚至乎有懷疑佢當初係想箍住個老公而自己一廂情願生咗個仔，所以老公現在採取愛理不理嘅態度。佢兩公婆未來係點都係佢哋嘅選擇，但係我覺得最痛苦就係個仔

生仔真係要考牌，當日大家未溝通清楚就要生個B出嚟，又害咗下一代，且生完仔之後從來都未開心過，我真係覺得好可悲

讀者投稿@未考慮清楚就去生仔