#ParentLicenses2173

睇咗早排個人奶洗傷口文章，令我想上嚟呻下

我係一個準媽媽，由於工作關係，好多時都唔準時返工同放工，所以我同老公已經傾好咗日後照顧小朋友嘅安排，包括我哋都覺得以我哋嘅情況係餵奶粉會簡單啲

而我呀嫂係一名超級人奶fans，真係覺得餵人奶得天下嗰種。由我宣布我有咗，呀嫂佢已經不停洗我腦

當然，我有同佢解釋過：「我明白人奶嘅好處，但基於我覺得我唔可以定時泵奶嘅關係，所以我決定餵奶粉算數」

又當然啦，絕對係唔能夠咁樣就打發到佢

呀嫂為咗証明俾我睇泵奶唔係咁煩，佢開始不定時咁通知我佢幾時泵奶。有時係一個訊息，有時連埋一張相，再同我講類似「其實幾時都可以泵㗎☺️」「加油👍🏻」之類嘅訊息，亦會不定時俾好多人奶資訊我

有一次我做緊嘢，佢發訊息俾我，我根本無時間睇，所以我hea咗個訊息大約六七個鐘都無讀取。直到收工，我就清一清啲訊息，篤入去等佢「已讀」就算

喺我「已讀」咗個訊息短短幾分鐘之內，呀嫂佢打俾我，開始同我講返嗰堆訊息嘅內容。其實嗰下我啱啱放工，個人都未回氣，所以我有少少煩躁

然而我都聽呀嫂講晒先嘅，惟之後我就同佢講：「其實呀嫂！我多謝你嘅好意！但真係唔使再講，我決定咗係奶粉；或者其實都唔急！可以等BB出咗世再算，我而家好攰，人奶呢個問題對我呢一刻真係一啲都唔急」

呀嫂聽完灰咗，卒之收到線，天真嘅我以為終於完咗……

過咗幾日，佢又嚟料啦。佢今次先發送一張相嚟，內容係有幾包奶，佢話：「呀妹！我諗過啦，我幫你開始儲奶，我泵定幫你雪住，放心交俾我」

痴撚線㗎🤦🏻‍♀️🤦🏻‍♀️🤦🏻‍♀️🤦🏻‍♀️

我對人奶唔反感，但我反感人奶膠

讀者投稿@G小姐