#ParentLicenses2167

我得罪咗我呀嫂

話說有日我帶三歲兒子跟我呀哥一家大細落公園玩，我個仔踩滑板車跣胎仆街，兩個菠蘿蓋當堂磨薑磨到爆晒缸

正當我買完消毒藥水同膠布返嚟，想幫呀仔處理傷口之際，已見呀嫂攞住個水樽喺附近公廁衝出嚟，嗰刻我已心知不妙……

嫂：「攞去幫你個仔洗咗傷口先啦」

我冇睇錯，也冇估錯，樽入面嘅係「新鮮人奶」

一直以來，我都知呀嫂係一位狂熱嘅人奶主義者，自佢個仔出世後呢四年，每逢大家有咩水土不服、蚊叮蟲咬，甚至暗瘡皺紋，佢都會好慷慨捐出自己嘅奶幫大家驅邪治病、養顏保健

總之呢幾年，同佢講親任何話題，佢都可以搭條線去聖潔嘅人奶之上

但今次，用人奶洗傷口，重要係別人家喺公廁揸出嚟嘅奶，我真係接受唔到

事後，我呀哥同我講返，佢話呀嫂嗰日好唔開心，覺得自己一片丹心就咁俾我掉落溝渠。佢話外國好多人都會用人奶搽傷口，人奶係神仙水是常識，唔明香港點解重咁落後，咁樣對人奶媽媽係好唔尊重

此前，佢甚至覺得我個仔有過動症行為，同埋之前中COVID等等，唔多唔少都係受奶粉嘅添加成份影響

嗰刻我唔知可以俾咩反應

作為一個人奶叛徒嘅我，雖然同呀嫂道不同，但一直以來，對佢四年嚟不辭勞苦埋身餵母乳嘅堅持都表示非常敬佩，坦白講，真係唔容易㗎

縱然有時我會覺得佢過咗火，畢竟男孩子到四歲仍每晚吸啜母乳至瞓得著，感覺總是怪怪的，但基於尊重，和而不同，我唔會批評

曾經我都好遺憾，因為自己要返工而好早幫BB轉全奶粉。試問天下間邊個媽媽唔想將最好嘅俾下一代？始終每個人嘅體質、生活、種種客觀條件都唔一樣，冇得強求

個個想36E，唔通個個都36E咩

我想講嘅係，其實「人奶媽」與「奶粉媽」都各自背負自己嘅十字架，但可以肯定嘅係大家對自己小朋友嘅愛係冇高低之分

反而好多時，我都好希望喺人奶媽媽要求我哋尊重佢哋嘅同時，佢哋也懂得體諒奶粉媽媽嘅苦心，尤其唔好喺我哋小朋友生病受傷嘅時候講啲咩「因為冇食人奶」之類嘅二次傷害說話

明白人奶是個好東西，但腦袋亦然

當日面對住兒子兩個跌到損晒又標緊血嘅膝頭哥，我選擇相信消毒藥水而唔係神聖嘅奶水，我何嘗唔係都希望得到呀嫂嘅尊重？

希望如果呀嫂睇到呢篇後可以體諒我當日嘅決定，抱歉最後用唔著你無私奉獻嘅奶，但我確實係非常感恩有你嘅關心，唔好再嬲豬我啦

讀者投稿@奶粉